Home Corte Caso Ibis: Hof a atende cu e parti di malversacion di Paul...

Caso Ibis: Hof a atende cu e parti di malversacion di Paul Croes na su Fundacion Excelence

SHARE

Oranjestad:
Diamars mainta Hof a atende cu e parti di malversacion di Paul Croes na su fundacion Excelence. Abogado mr Illes a presenta documentonan den corte y pa e motibo aki a pospone e caso pa sigui awe.

E documentonan ta trata di investigacionnan haci pa mustra con nan lo a yega na fondonan/placa, por ehempel regalo di bruid, caminda hendenan a duna regalo den efectivo, dus un cantidad di placanan y articulonan cu nan a haya como regalo di boda

Hof a puntra dicon ta te despues di 2 aña y mey a haci e investigacionnan aki. Paul a splica cu e investigacion ta asina costoso y cu ta te awor e la pidi su famia un ayudo financiero pa asina e por a laga haci e investigacionnan aki.

Hof a mustra cu por mira cu tin un cantidad grandi di gastonan di restaurant cu a wordo inclui y a puntra si esaki ta parti di campanja politico. Paul Croes na su turno a splica cu su accountant a haya cu esakinan tur ta forma parti di gastonan di representacion.

Hof a sigui puntra con e accountant por sa cu ta gastonan di representacion. Paul a bisa cu esaki ta a base di e ponencia di Minsterio Publico, bisando cu ta malversacion na restaurantnan y pa e motibo aki a pone nan como gastonan di representacion.

E la splica cu ta den restaurant e tabata reuni cu hendenan tocante con ta hiba campanja. Tambe Paul a bisa cu e presidente di su fundacion Excelence, Sr. Capriles a dicidi cu tur e gastonnan ta cay bou di gastonan di representacion.

Paul Croes a bisa cu Capriles a wordo forsa pa Landsrecherche y tambe palabranan tabata wordo poni den su boca, simpelmente pa perhudica su persona. Paul a bisa cu e tabata sa cu e la haci hopi gastonan y cu e tabata duna Capriles e recibonan.