Home » Cambionan historico den Codigo Civil ta drenta na vigor dia 1 di september 2021

Cambionan historico den Codigo Civil ta drenta na vigor dia 1 di september 2021

by Admin
0 comment 115 views

Na aña 2002 a renoba gran parti di e Codigo Civil di Aruba, conoci na Hulandes como e ‘Burgerlijk Wetboek van Aruba’ (BWA). E tempo ey a scoge pa laga algun topico y temanan specifico pendiente. Na aña 2016 a aproba e Ordenansa (‘Landsverordening’) pa caba di actualisa e Codigo Civil (AB 2016 no. 51). Ta trata aki di e adaptacionnan den e leynan di persona y famia (‘Buki 1’), ley di propiedad (‘Buki 3’), ley di herencia (‘Buki 4’) y e leynan cu ta regarda acuerdonan special (Buki 7). Buki 5, ley di derechonan pa cu  derechonan estableci riba propiedad y inmueble, y Buki 6, ley di contrato, tambe a conoce cierto cambionan. Sinembargo pa por a laga dicho Ordenansa drenta na vigor mester a reglamenta cambionan den varios ley y introduci reglanan di transicion. Esey a tuma luga pa medio di Ordenansa di 8 di maart 2021 (AB 2021 no. 43).

 

Ta bon pa menciona cu entretanto e Ordenansa pa introduccion di e ‘Buki 2’, relaciona cu stipulacion di entidadnan legal tambe a drenta na vigor na januari 2021. Pues por bisa awor, cu despues di tur adaptacion y aprobacion di Parlamento, cu henter nos Codigo Civil di Aruba ta completamente modernisa!

 

Mester menciona cu varios adaptacionnan haci den e Codigo Civil, ta cambionan tecnico y di terminologia relaciona cu introduccion di e cambionan riba nan mes. Hopi biaha ta e titulonan of stipulacionnan a adapta of cambia y uza otro nomber y/of palabra.

 

En todo caso e cambionan principal ta den Buki 1:

  • Cambio den scogencia di fam ora un yiu nace of bira mayor di edad. Ora e nace ta e mayornan y despues ora e bira mayor di edad e mes por haci cambio na su fam.
  • A revisa e regimen di derecho di propiedad matrimonial;
  • A introduci determinacion hudicial di paternidad;
  • A revisa e acuerdonan di custodia comparti despues di divorcio;
  • A adapta e leynan rond di “geregistreerd partnerschap” (‘union civil’).

 

Den Buki 4:

  • A determina e leynan nobo di herencia.

 

Den Buki 7, 

  • Revision di acuerdonan special referente huur y leynan di contrato laboral.

 

Minister mr. Andin Bikker ta masha contento cu porfin e proceso aki ta keda cla, despues di tanto aña di revision, adaptacion y cambionan cu mester a tuma luga conhuntamente cu Parlamento. Cu masha orguyo, net un poco prome cu e retira di e puesto, dia 1 di september 2021 e Codigo Civil nobo cu tur e cambionan ta drenta na vigor. Esaki ta un adelanto grandi pa Comunidad completo, incluyendo esunnan cu tin cu traha cu e leynan aki tur dia, manera por ehempel Corte Comun, notario, abogado, y deurwaarder. Pa nos Comunidad, e cambionan ta brinda varios oportunidad nobo cu antes no a conoce. Den e dianan y simannan nos dilanti lo dedica atencion na cada un di e cambionan aki separa, pa informa nos Comunidad di tur e cambionan den e Codigo Civil.

 

—-

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio