Un mama na California, diahuebs ultimo, mester a lucha cu un puma pa asina salba su yiu homber di 5 aña for di un morto cruel, despues cu su yiu a wordo ataca pa un puma.
E mama, pa por a logra libera e criatura for di e garanan di e puma mester a dal e puma hopi duro riba su cabes, cu e puma a spanta y a huy. Un rato despues e puma a wordo mata pa autoridad encarga cu naturalesa.
Na California e incidente aki a bira un noticia hopi grandi, pa motibo cu masha poco biaha pumanan ta ataca hende.
Calabasas, California, Estados Unidos:
Calabasas ta un pueblo di mas o menos 24 mil habitante y ta keda poco pabou di Los Angeles. Diahuebs mainta na Calabasas, un criatura di 5 aña tabata hungando den su cura di cas y di golpi e la wordo ataca pa un puma. E puma a gara e mucha cu su boca y a lastre den e cura di cas pa asina trata na bay cu ne. E mama a tende su yiu ta grita, mesora e la core sali pafo y a mira con e bestia tabata tin su yiu den su gara.
Mesora e instinto di mama a domina e mama y e mama a cuminsa scop e bestia y a keda sute cu scop y mokete riba su cabes, e bestia a spanta y a laga e mucha los. E puma a core bay den un mondi cerca di e cas.
E criatura a haya heridanan serio na su cabes y na e parti ariba di su curpa. E la wordo interna na un hospital di mucha na Los Angeles. Su situacion a stabilisa y ta bayendo hopi mas miho. Vocero di Fish and Wildlife a expresa cu nan ta considera e mama un heroe absoluto, cu a sa di salba bida su yiu.
Mesora despues di e incidente horibel aki, un delegacion di departamentonan gubernamental encarga cu Wildlife di California a sali enbusca di e animal. Un di e empleadonan a bin topa cu e puma den un mondi cerca di e cas di e mucha. Aparentemente tabata trata di e puma cu un rato prome a ataca e mucha. Pa tur seguridad e la wordo mata.
Pa confirma cu tabata trata di e mesun puma cu a ataca e mucha, autoridad encarga cu Wildlife a laga haci un investigacion di DNA y enberdad tabata trata di e mesun puma cu a ataca e criatura. Tabata trata di un puma basta jong cu tabata siñando con pa jaag y con pa gara su prooi y asina ta capas di percura pa su mes.
Na California, masha poco pumanan ta ataca hende, un pro medio di un caso den cada 4 aña. Pumanan ta ataca hende ora nan ta sintinan menasa. Un puma macho por pisa te 100 kilo y un puma muhe por pisa un 65 kilo ney. Puma nan color ta bruin shinishi y ta crece bira un meter, pumanan ta mas activo durante oranan di anochi y nan por core distancianan hopi largo.