San Diego, California:
Sirhan Sirhan, e homber cu a wordo sentencia pa a tira Robert F. Kennedy mata, despues di 53 aña tras di tralie lo por bay recobra su libertad condicional. Esaki e comision di husticia di Californa a duna di conoce, diabierna ultimo, pues cu Sirhan di 77 aña lo por recobra su libertad condicionalmente.
Ni e comision, ni Ministerio Publico di California no tabata tin niun obhecion contra e 16 peticionnan entrega pa libertad di Sirhan. E destino di Sirhan awo ta den man di e gobernador di California, Gavin Newsom. E lo dicidi si Sirhan lo recobra su libertad. Un vocero di e Gobernador, diabierna ultimo no por a informa prensa ainda referente ki desicion e gobernador lo tuma.
Sirhan a splica e comision di husticia cu, “mas cu mita siglo a pasa y e no ta e hoben impulsivo mas” e la sigui splica cu, “Kennedy tabata e speranza di henter mundo y mi a haci tur hende hopi dolor cu acto horibel aki.”
Algun miembro di famia Kennedy a sigui e audiencia aki via imagennan live di video, entre otro Douglas H. Kennedy, yiu homber di Robert Kennedy. Segun Douglas e ta na fabor pa laga Sirhan den libertad. Douglas a sigui splica: ” Mi no ta di acuerdo pa laga un persona cera, cu no ta forma niun clase di peliger pa su mes of ta otro, e mester wordo laga den libertad”. Segun Douglas Kennedy e la keda hopi conmovi pa e speech den cual Shirhan a pidi su disculpa, e por a mira awa di wowo core for di su wowonan.
Segun Douglas Kennedy, henter su bida e tabata tin miedo di Sirhan, pero awo mir’e frente a frente, e la cambia, e ta gradicido di por mira Sirhan awo como un persona cu merece compasion y amor.
Sirhan tabata un imigrante Palestino cu na 1968 a tira Robert F. Kennedy, ruman di Presidente John F. Kennedy cu 5 aña prome tambe a wordo tira fatalmente . Robert tabata coriendo campaña pa bira presidente. Riba 5 di Juni 1968 na Los Angeles, e la wordo tira pa Sirhan y un dia despues e la fayece na hospital na edad di 42 aña. Segun Sirhan e la tira Kennedy pa motibo cu e tabata apoya Israel
Na 1969 Sirhan a wordo sentencia cu castigo di morto, pero algun aña despues su castigo a wordo remplaza cu cadena perpetua. E ta bay haci 53 aña cera den un prison na San Diego. Na 2019 e la wordo agredi pa un otro preso y a wordo hinca, e mester a keda algun tempo interna na hospital.