Home Dutch Kingdom Dutch Caribbean Nature Alliance ta finalisá Bishita di Trabou na Saba, Statia...

Dutch Caribbean Nature Alliance ta finalisá Bishita di Trabou na Saba, Statia i Sint Maarten

SHARE

A Suprayá Nesesidat Mas Grandi di Sosten pa Konservashon di Naturalesa na Nivel di Reino

 

Kralendijk- Presidente di Dutch Caribbean Nature Alliance (DCNA) dr. Hellen van der Wal i direktor di DCNA Tadzio Bervoets resientemente a kompletá un bishita di trabou pa Saba, Statia i Sint Maarten. Esaki tabata e promé enkuentro, ku kontakto físiko, for di e inisio di e pandemia di COVID19, entre DCNA ku personal i miembronan di direktiva di Saba Conservation Foundation, STENAPA na Statia i Sint Maarten Nature Foundation, durante un bishita di trabou.

 

 

Durante e bishita di sinku dia, van der Wal i Bervoets a bishitá e direktornan di e respektivo organisashonnan huntu ku nan miembronan di direktiva, Anthony Reed di direktorado di Agrikultura i Naturalesa i Komisario di Reino interino na Statia Claudia Toet i Gobernador Holiday ku representantenan di su Gabinete na Sint Maarten. E tópiko komun di e enkuentronan tabata, e nesesidat pa un sosten mas amplio pa Konservashon di Naturalesa den e parti Karibense di Hulanda, na nivel di Reino. “Ora ku ta toka tópikonan manera Kambio di Klima, e Plan nobo pa Maneho di Naturalesa i Medioambiente i tambe otro konsiderashon ku ta konta pa mas ku un isla, ketu bai nos ta pidi pa sosten mas haltu for di Nivel di Reino. Ainda tin muchu hopi pregunta di parti di e Gobièrnunan i di e Organisashonnan di Konservashon na e islanan, tokante e kontribushon finansiero, pa por ehèmpel e Plan nobo pa Maneho di Naturalesa i Medioambiente.  Ademas, tin masha tiki te nada di menshon di e parti di Karibe Hulandes serka Reino, ora ta trata e impaktonan di Kambio di Klima. Anto esaki miéntras ku e parti Karibense di Hulanda tin e kantidat mas haltu di biodiversidat,” e direktor di DCNA Tadzio Bervoets a komentá.

Miembronan denter di e ret di DCNA a hasi yamada pa oumento di sosten pa Konservashon di Naturalesa na nivel lokal, regional i nivel di Reino, espesialmente ora konsiderá e papel importante ku naturalesa ta hunga den e proseso pa rekuperá di e pandemia global; “Hopi di e tratadonan internashonal ku ta enfoká riba konservashon i klima ta trahá na nivel di Reino, pero denter di Reino tin muchu hopi desigualdat den e atenshon i enfoke ku e islanan ta haña miéntras nan ta hibando lucha pa logra nan metanan di konservashon. Miéntras ku DCNA definitivamente ta pone su metanan pa atendé ku e bashí akí, ta keda na e respektivo Gobièrnunan na tur nivel pa sigurá ku por implementá i ehekutá aktividatnan di konservashon efektivamente. Naturalesa ta importante pa kapasidat di tur e islanan, pa rekuperá di e impaktonan ekonómiko di e pandemia, i mester ta sentral den plannan pa sigurá rekuperashon, di tantu e temporada di Orkan 2017 komo di e pandemia global ku ta manifestando ainda,” Bervoets ta konkluí.