Oranjestad: Dialuna mainta 9’or y mey, Corte Superior lo trata Caso IBIS, e tratamento di e caso aki lo dura tres dia. Manera ya ta conoci na maart 2017 Ministerio Publico a detene y a interoga varios persona relaciona cu e conocido Caso grandi di corupcion cu ta hiba e nomber Ibis.
E sospechoso principal Sr. Paul Croes, na maart 2017 tabata Minister di Labor, di Gabinete Mike Eman II. Sr. Paul Croes ta wordo sospecha di cargonan hopi pisa entre otro di corupcion, soborno, labamento di placa, y di ta forma parti di un organizacion criminal etc. Paul Croes a keda deteni y encarcela na KIA pa 80 dia sin por a comunica cu su famia.
Na februari 2019, Corte den Prome Instancia a haya Sr. Paul Croes culpabel y a sentencia Sr. Croes cu un castigo di prison di 4 aña. Mientras Fiscal a pidi 5 aña di castigo di prison pa Paul Croes.
Sr. Paul Croes y su señora Melony Croes Paesch, ambos no tabata di acuerdo cu e sentencia cu nan a ricibi di e hues di Corte di Prome Instancia y ambos a dicidi di apela pa bay Corte Superior. Dialuna 30 di Augustus 2021 ta e dia cu un biaha mas nan mester bolbe presenta den corte.
Ministerio Publico tambe a apela mirando cu nan no tabata satisfecho cu e sentencia cu algun di e sospechosonan di caso IBIS a haya for di e Hues den Corte di Prome Instancia. Aki ta trata di Jairo J. Wever, Robbio Di Vecchia, Rudmilla Martinus y Ninosca Nuñez.
Ninosca Nuñes ta sospechoso den dos caso grandi di corupcion, cual ta IBIS y AVESTRUZ. Ninosca ta casa di Gaby Werleman, kende ta un persona prominente di partido AVP y alabes Sr. Gaby Werleman tambe ta un di e sospechosonan den caso Avestruz. Caso Avestruz tambe ta cargonan pisa, corupcion, labamento di placa, bendemento y irregularidad cu terenonan di pais Aruba. E sospechoso principal di Caso Avestruz ta ex Minister y actual parlamentario di partido AVP Sr. Benny Sevinger.
No ta descarta e posibilidad cu dentro di poco Caso Avestruz lo yega corte y cu Sra Ninosca Nuñes lo mester bolbe presenta den corte pa tratamento di caso Avestruz di cual su persona y su casa ta sospechoso.
Gabinete Mike Eman II cu e dos casonan aki a marca historia, algo cu antes nunca a yega di sosode, un gabinete den cual dos Minister ta wordo sospecha di cargonan hopi serio y pisa, di corupcion, soborno, labamento di placa, forma parti di un organizacion criminal etc.
