Home Corte Caso IBIS bek den Corte, Segun Paul Croes: ” a interpreta cos...

Caso IBIS bek den Corte, Segun Paul Croes: ” a interpreta cos robes, ora e la pidi comerciantenan cahanan di cerbes pa e concierto di partido AVP”

SHARE

Paul Croes: “Benta di ticket di concierto di AVP, pidimento di caha di cerbes y donacion a wordo interpreta robes, cu dunamento di permiso.”

Oranjestad:
Ex Minister di Labor di Gabinete Mike Eman II, Sr. Paul Croes, su señora Melony Croes Paesch, despues di a haya un sentencia den Corte di Prome Instancia na februari 2019 a dicidi di apela e sentencia aki. Paul Croes a haya un sentencia di cual tabata consisti di 4 aña di castigo di prison.

Fiscal tampoco no tabata di acuerdo cu e sentencia cu e otro sospechosonan a haya den Corte di prome Instancia na februari 2019, e sospechosonan tabata Jairo Wever, Robio Di Vecchia, Rudmilla Martinus y Ninosca Nunez (casa di Gaby Werleman kende ta un sospechoso tambe den un otro caso grandi di corupcion cual ta Avestruz).

For di trempan por a mira yegada di famianan y amigonan di Ex Minister Paul Croes, tambe di e otro sospechosonan, na Piedra Plat Entertainment Center, for di aki via un screen nan por sigui e caso bibo for di Corte.

Procureur General a presenta caso Melony Croes Paesch den cual e ta wordo acusa di 1 di januari 2014 pa maart 2017 di labamento di placa. Tambe for di 20 di december 2016 pa maart 2017 di a laga un dama di inicial S. drenta cu tabata ilegal.

Jairo Wever ta wordo acusa di 08 di maart 2017 di a duna e ex Minister Paul Croes un suma di 1500 florin pa asina regla un permiso.

Robio di Vecchia ta wordo acusa cu for di 1 di februari 2015 pa maart 2017, lo a duna regalo pa servicio na e Ex Minister Paul Croes, referente instalacion di airco,acambio pa regla permiso.

Ninosca Nunez ta wordo acusa cu for di oktober 2016 pa maart 2017 a duna Paul Croes un suma di placa pa permiso y dispensacion.

Rudmilla Martinus ta wordo acusa di 2016 pa 2017 di a duna Excellence of Arends placa pa regla permiso na Dimas.

Paul Croes ta wordo acusa di labamento di placa na Excellence, di a laga e dama S. drenta ilegal Aruba, di a forma parti di un organizacion criminal dedica na labamento di placa.

Un Paul Croes hopi emociona, cu awa na wowo, den su defensa, a bisa cu a tap e combersacionnan di dje cu su amistadnan di hopi aña y ta interpreta cu lo ta trata di cumpramento, tabata tin combersacionnan tocante permiso y a interpretanan robes, cu e lo a haya placa of fabor pa asina e regla permiso. Tin hende a bisa cu mil amor lo yuda y a interpreta esaki cu ta mil florin.

E la sigui bisa Hof cu e caso aki ta poniendo masha hopi presion riba su famia, ta ocho luna largo cu a investig’e. Door di e caso aki, hopi amistadnan y famia a distancia di su persona.

Hof a mustra cu tin cierto comerciantenan ta bisa cu no tin negoshi mas y cu Paul mester ta cerca otro. Paul a desmenti esaki, bisando cu esaki no ta cuadra cu e berdad. E la enfatisa cu nunca e la forsa hende pa haya caha di cerbes of pa un of otro motibo.

Hof a mustra con Paul ta pensa di Sr. Aparicio cu tabata core cu Paul y busca fabornan, e la haya tres luna di prison y no a apela. Paul na su turno a bisa cu e la haya hopi duele di Aparicio cu e no a apela.  E la bisa cu 68 dia largo Aparicio a keda cera sin por a sali for di cel pa tuma aire.

Paul Croes den su defensa a bisa cu e pidimento di caha di cerbes of placa di ticket pa concierto no tin nada di haci cu dunamento di permiso, pero tabata trata di campaña politico. E ta haya cu ta na un forma inhusto a duna declaracionnan pa perhudik’e. Hopi emociona emociona e la sigui bisa, cu e lo kier bisa hopi mas cos,  pasobra awo ta su oportunidad  den su caso di apelacion.

E la sigui bisa cu nan a interpreta cosnan robes, ora e la pidi comerciante cahanan di cerbes pa e concierto di partido AVP, e “Concierto di Speranza”,  cu hende ta pidi pa permiso.

Hof na su turno a bisa cu con por interpreta esaki robes!  Segun Paul, e la acerca 13 negoshi pa cumpra ticket pa e concierto di partido AVP. E ticketnan tabata costa 100 dollar y con ta pinta esaki cu dunamento di permiso.

E la bisa cu ta 90 negoshi a haya permiso pa hendenan di exterior y no ta manera Ministerio Publico ta pinta e cosnan, cu e lo tabata presiona comerciantenan pa cumpra ticket of haci donacion y asina lo duna dispensacion of permiso.  E la bisa cu hopi negoshi a cumpra ticket den pasado cerca otro minister, prome cu e tabata Minister.

Esaki ta e prome parti, tratamento di e caso lo sigui pa dos dia mas.