ta informa encuanto un cambio den e Landsverordening beëindiging arbeidsovereenkomsten (ley di retiro) entrante 01 di september 2021
ORANJESTAD – Entrante 01 di september 2021 lo tuma lugar un cambio di articulo 2 sub a di e Landsverordening beëindiging arbeidsovereenkomsten (ley di retiro).
Art. 2 di e ley di retiro ta regla cu cierto grupo di trahado ta exclui di proteccion di e ley di retiro. Por ehempel trahadonan den servicio di entidadnan publico incluyendo empleadonan publico como tambe empleadonan cu ta traha den servicio di gobierno a base di un contracto laboral, docente y maestronan den servicio di un instituto educacional, pastornan den servicio den e sector di clero y trahadonan cu ta duna servicio domestico na cas di famia priva etc.
Actualmente den art. 2 sub a di e ley di retiro ta stipula cu pa trahadonan den servicio di un entidad publico no mester pidi un peticion pa retiro na Director di Departamento di Labor & Investigacion (DAO) den caso cu kier termina e relacion laboral. E articulo aki lo conoce un cambio entrante 01 di september proximo, caminda ta cambia e palabra “entidad publico” pa e palabra “gobierno” cu lo significa cu solamente pa e grupo di empleado publico y empleadonan cu ta traha den servicio di gobierno a base di un contracto laboral NO lo mester pidi un peticion pa retiro na Departamento di Labor & Investigacion.
Pues trahadonan den servicio di entidadnan publico, p.e. Banco Central di Aruba, Universidad di Aruba, Aruba Tourism Authority, Serlimar etc. lo haya proteccion di e ley di retiro y den caso cu kier termina e relacion laboral cu un trahado, e dunado di trabou lo mester sigui e procedura di peticion pa retiro na DAO.
Banda di e forma di terminacion aki tin otro formanan riba cual un relacion laboral por termina. Pa e formanan aki no mester di permiso di Director di DAO. E formanan mas comun pa terminacion ta:
- retiro inmediato;
- cu aprobacion mutuo;
- termina automaticamente conforme e contracto laboral (van rechtswege);
- disolucion di e contracto laboral pa hues (ontbinding);
- terminacion durante periodo di prueba (mester ta acorda por escrito).
Departamento di Labor y Investigacion ta pidi tur trahado y principalmente dunadonan di trabou pa tene bon na cuenta e informacion aki. Pa pregunta por yama nos na 523- 7720 of manda nos un mail na nos email central: [email protected]. Tambe por sigui nos riba www.daoaruba.com of riba nos pagina di Facebook: Directie Arbeid en Onderzoek.
NOTA:
Pa potret pa acompaña e comunicado aki porfabor check cu