ORANJESTAD – Awe merdia 2’or via video conference Hues di Corte den Promer Instancia a atende e caso penal pro forma contra e sospechoso Elvis Weert. E sospechoso Weert tabata den un oficina na KIA mientras cu den sala di Corte tabata presente Hues, Fiscal y abogado mr. Mohamed. Fiscal a haci un serie di acusacionnan hopi serio contra Weert y a bisa cu e caso ta pro forma y ta pidi un otro fecha pro forma pendiente di un investigacion andando.
ABUSO DI MUCHA
Aruba Native por a compronde cu e promer acusacion ta cu entre 19 Maart 2005 te cu 1 Maart 2009, Weert door di usa menaza y violencia, a viola e mucha G. E tempo ey G., tabatin 14 aña y tabata bou cuido di Weert. Fiscal a menciona cu Weert ta wordo sospecha di a mishi na e mucha su pechonan, su parti intimo y a tene relacion sexual cu e mucha.
E mesun abusonan aki a sosode tambe entre 19 Maart 2005 te cu 18 Maart 2007 y entre 19 Maart 2007 te cu 1 Maart 2009.
CAUSA MISKRAAM
Fiscal tambe ta acusa Weert cu entre 19 Maart 2006 y 19 Maart 2009, intencional y premedita, a maltrata e hoben G.(18) cu consecuencia cu el a sufri un miskraam. Segun e acusacion, Weert lo a hinca un hangua of algo skerpi den/na e parti intimo di G. cu consecuencia cu el a sufri un miskraam.
Fiscal na final a bisa Hues cu e ta propone pa fiha un otro caso pro forma 5 November 2021. Esaki pasobra ainda ta investigando un caso abortus cu Weert lo a haci cu e mesun victima aki.
Hues a dicidi cu ta pospone e caso pro forma pa 5 November 2021 mientras cu Weert ta keda sera den KIA.