Paramaribo, Suriname:
Ladronicia di arma di candela for di residencia di ex presidente Desi Bouterse, e posibel ladron aparentemente lo ta su propio nieto Walter Bouterse. Segun Starnieuws Bouterse lo a menciona esaki durante su interogacion na polis Surnam.
Fin di juni ultimo Desi Bouterse a entrega un keho di ladronicia di un arsenal di arma for di su residencia, tabata trata di en total 46 arma pisa, entre otro rocket launchers tambe.
Bouterse a bisa cu e la descubri e ladronicia di e armanan for di su cas, dia 22 di juni, esaki tabata despues cu su nieto Walter Bouterse a pone fin na su bida. E ex presidente a tende cu nan a haya arma y municion den e cas di su nieto. Pa e motibo aki e la bay tira un bista den e camber caminda su armanan ta warda y a descubri cu e tabata falta en total 46 arma y municion. Mesora e la entrega un keho di ladronicia.
Bouterse ta sospecha cu su nieto Walter lo a coy e yabi di e kamber for di den un cashi di su casa, aki ta caminda nan tabata warda un di yabinan di e kamber caminda e armanan ta warda. Bouterse ta pensa cu su nieto hopi tempo pasa lo a pasa man pa e yabi aki, mirando cu e tin aceso den full e cas.
Segun Bouterse, tres yabi nan tabata tin di e kamber, un yabi cu sempet tabata den su tas, e di dos tabata warda den su locker y e di tres tabata wordo warda den cashi di su casa Ingrid Waldring-Bouterse.
Bouterse a declara cu memey di juni tabata e ultimo biaha cu e la inspeciona e kamber caminda e armanan ta wordo warda y no a ripara cu e tabata falta e armanan. E ex presidente a wordo interoga pa polis na juli y na augustus relaciona cu e ladronicia di 46 armanan di candela.
Polis muy pronto kier haci un investigacion forensico den e cas di ex presidente Bouterse.