Dos mucha chikito a sa di stuur un SUV y para esaki na banda di caminda, despues cu nan a tata a wordo tira fatalmente na momento cu e tabata tras di stuur.
Houston, Texas, USA: Polis na Texas ta buscando e persona cu a tira un tata fatalmente na momento cu e tabata tras di stuur di su SUV, hunto cu su dos yiu hombernan (6&8 aña) den auto. E muchanan pa scapa nan bida a hayanan obliga di stuur e auto y para esaki safe riba un parkinglot na banda di caminda.
Diabierna den careda di 10’or y 40 di anochi, e tata (29) tabata riba e interstate 10 na houston cu su dos yiu hombernan chikito, na momento cu e dos muchanan a scucha un zonido fuerte y a mira con nan tata a sak den otro riba e stuurwiel di e auto.
E muchanan mesora a tuma e stuurwiel over y a stuur e auto bahe for di e freeway y a par’e safe na banda di caminda. Mesora nan a sali na grito ta pidi ayudo, un señora cu tabata saliendo for di un restaurant a mira e dos criaturanan aki pidiendo ayuda, mesora e la bay yudanan y a bati alarma.
Polis cu urgencia a wordo manda na e sitio, na yegada e agentenan policial a nota cu e victima a wordo tira den cabes y a muri mesora na e sitio. E dos criaturanan a conta polis cu nan a kere cu un persona lo a tira nan tata cu un piedra.
Segun investigacionnan na e sitio e tata a bira un victima mas di violencia cu arma di candela. Ken a tira e tata no ta conoci ainda, tambe no ta conoci si e homber ta victima di un tiroteo, violencia den trafico of un otro motibo. Polis na Texas ta buscando un auto blanco. E investigacion di e tiramento fatal aki ta den full swing.
