ORANJESTAD/SAN NICOLAS – Despues di a inicia guiya na ciudadanonan adulto desde aña 2019 – como organisacion pionero – pa yuda ciudadanonan sali for di debe, como tambe construi un futuro financiero stabiel atrabes di nan curso Financial Freedom, Lead2Success recientemente a guiya diesnuebe (19) mucha entre edad 6 pa 12 aña atraves di nan curso adicional titula, “Financial Kids 2021.”
Facilita pa Entrenado Financiero Certifica, Coach Francis Groeneveldt, muchanan nan mente a wordo adecuadamente dirigi na un mentalidad pa exito pa loke ta trata maneho di finansas, siñando nan con pa hiba un bida financiero responsabel, e diferencia entre debe, inversion, spaar y e perseverancia nesesario pa por logra nan metanan den bida.
“Tur cos ta cuminsa cu nos mente, nos manera di pensa y con ekipa esaki ta. Nos mente ta algo hopi podersoso y no tin mag di keda bashi of wordo desperdicia. E ta algo cu mester wordo nutri, dirigi y adecuadamente ekipa pa por ta lo miho posibel prepara. Como adulto, nos ta responsabel pa guiya e muchanan nan mente den e direccion cu nan mester bay y esaki sigur tambe ta conta pa nan bida financiero,” Coach Francis Groeneveldt a duna di conoce.
“Desde 2019 nos a bin ta haci esaki y a logra guiya 275 cursista adulto nabega nan bida financiero pa uno sano, liber di debe y algun ta riba e bon caminda pa por logra esaki pronto. Y asina aki tambe a yega e momento pa atende na un manera preventivo nos futuro generacionnan y a opta pa lansa Lead2Success su curso nobo, “Financial Kids 2021.”
“Cuminsa cu e materia aki cu muchanan desde un edad hoben no ta un luho pero mas bien un nesesidad. Si mira bon rond di nos, e ta biba den mas di un tercer parti di nos comunidad cu nos ciudadanonan no tin inteligencia financiero. Y e meta pa cuminsa cu nos muchanan ta pa kibra e ciclo existente aki na Aruba y inicia generacionnan nobo cu inteligencia fiananciero. Nos tin cu re-educa nos nacion pa por evita hopi situacionnan desagradabel sigui regenera den e futuro di nos pais. E ta traha tanto preventivo, como constructivo. Pruebanan lo bin den bida, pero miho ekipa nos muchanan ta, mas miho nan lo bay sa kico pa haci pa por nabega nan mes di manera exitoso a traves di e pruebanan,” Groeneveldt a sigui bisa.
“Cu nos prome curso di “Financial Kids 2021,” nos a tene dos sesion na San Nicolas y uno na Oranjestad. Topiconan cu e muchanan a siña tabata, “Working, Saving, Spending y Investing.” Tur mucha cu a participa a haya nan “Financial Study Kit” cu ta inclui tur e hermentnan nesesario pa duna nan e comprondemento nesesario con pa parti nan placa den diferente compartimento, separa esaki debidamente pa por cubri e metanan financiero.”
“Muchanan di awendia ta hopi sabi, nan kier siña tocante finansas y tabata haci preguntanan clave. Esaki ta hopi bon, pasobra tur cos ta drey rond di finansas, for di costo di necesidad basico pa e metanan personal cu nan lo bay tin. E curso a bay hopi bon mes, muchanan tabata hopi exita pa siña tocante maneho di placa. Tanto nan mayornan tambe tabata trece nan yiunan cu hopi gozo mirando con nan yiunan tabata siña.”
“Durante e ultimo dos añanan cu nos a bin ta drey e programa di Financial Freedom, nos no solamente a mira cambio den mentalidad den nos cursistanan, pero gran entusiasmo tambe, segun nan tabata alcansa cierto “milestone” na momento cu nan a logra e fase final di paga cierto debe.”
“Un bon maneho di finansas ta trece ordo y trankilidad. Lo contrario na esaki ta trece chaos, stress, problema den pareha, matrimonio, te asta divorcio y separacion den e nucleo familiar. Falta di maneho di finansas ta trece cieguedad, caminda cu parehanan ta pleita, odia otro y no por ni mira nan amor pa otro mas pa motibo di e montaña cu e chaos financiero a bira. Si solamente introduci conocemento riba e parti aki y trece maneho riba dje, e ta alivia un peso hopi grandi for di e situacion social di nos pais,” Groeneveldt a enfatisa.
“Lead2Success a lanta, cu e meta principal aki, pa mira e situacion social di nos pais sanea y nos hendenan bira feliz y bay dilanti. Pasobra tin gran satisfaccion y un sentimento di ta sinti bo util na momento cu logra paga debe #1, #2, etc y asina mira e pochi di inversion tambe crece. Parehanan ta bira contento y ta cuminsa mira luz na horizonte cu ta trece felicidad. E mesun felicidad aki tambe ta drenta e hogar, e ta bay riba nan yiunan kendenan na nan turno tambe ta bay miho na scol, nan sport etc… e tin un efecto positivo y hopi grandi den nos famianan. Algo, cu ta haci nos di Lead2Success tambe hopi contento di por forma parti di e proceso di saneamento di Aruba su nucleo familiar,” Groeneveldt a indica.
Den cuadro di esaki tambe nos ta cla pa continua cu e di dos curso di nos futuro lidernan y cabesnan di cas, “Financial Kids 2021.” Esaki ta programa pa cuminsa dia 25 di september 2021 binidero.
Pa tur mayor interesa pa registra nan yiunan tocante maneho di finansas, por tuma contacto cu nos via whatsapp at +297 5934535 of tambe por manda nos un email na: [email protected].
