Home Politics Parlamentario Endy Croes: Robert Candelaria a bay den Winterslap Mientras e...

Parlamentario Endy Croes: Robert Candelaria a bay den Winterslap Mientras e sospechoso principal Benny Sevinger ta cobrando salario di Parlamentario

SHARE

 

Parlamentario Endy Croes ta sigui e desaroyo riba tereno politica bastante di serca. Asina por tuma nota di desaroyonan no mucho postivo den e partido di AVP. Manera ta conosi cu AVP a cay atras cu 15 mil votos den 2 elecion y esaki ta un señal fuerte pa esnan na cabez cu nan mester saca nan conclusion. Banda cu e doñonan di partido AVP sinta den EMCO ta tuma desicionnan unilateral sin importa resto di partido, tin e otro parti unda  Liderazgo di partido AVP tambe ta tuma cierto desicionnan sin importa of incorpora directiva y otro candidatonan. Asina e democracia dictatorial den AVP ta funciona. Mike Eman y Benny Sevinger ta keda hasi todo por todo insistiendo contra tur “odds” pa nan keda na timon. Na 1977 AVP tabata un partido “chiripero” di apenas 1200 votos y sin ningun asiento.  Palancanan y Tamahocnan di AVP tin miedo pa historia ripiti y ta exigiendo algun cabez y cambio awor SI. 

/// E desicion pa bay elecion cu un sospechoso riba lista tabata devastador:

Desicion di Mike Eman hunto cu Benny Sevinger pa “cueste loque cueste” y “duela a quien le duela” mantene Benny Sevinger toch riba lista apesar cu e ta sospechoso mayor den caso di Avestruz, e caso di mas grandi di corupcion den historia di Aruba, no a cay bon tera den pueblo ni tampoco den seno di nan propio votadornan. Resultado di elecion a ilustra esaki unda Mike Eman y Benny Sevinger a sali den e Top (3)  liderando  e tabla di posicion di e candidatonan cu a bay  atras cu mas votos den un solo elecion. Benny Sevinger a bay atras cu 1171 votos mientras Mike Eman a perde 1154 votos. Hunto nan dos a bay atras 2325 votos.  Strategia di AVP pa wanta Benny riba lista no a duna e resultado cu AVP a spera esta pa mantene 9 of hasta bay 10 asiento segun nan strategistanan pero mas bien a resulta den un golpi devastador politico.

/// Tormenta Avestruz vs Candelaria apenas a cuminsa den AVP:   

E tormenta den AVP sinembargo recien a inicia. Tur esaki a trese cune cu Robert Candelaria un x hefe di Polis kende a traha di serca cu Ministerio Publico y ta esun cu zwaai cu e bandera di ta un politico “Integro” entre comias, mester  keda para pafor di Parlamento buscando un lift pa drenta. E lift cu e ta buscando hustamente ta cu sospechoso y e chauffeur Benny Sevinger.  Benny mester entrega retiro pa Candelaria haña su lift pa drenta Parlamento bek. Kisas Candelaria mester warda te dia e caso Avestruz bini dilanti “mesa berde” pero por lo tanto Candelaria por peña saca. Esaki ta causando masha hopi dolor y problema interno den AVP.  Ponemi corda muchanan di antes tabata gusta hunga e wega di “Polis cu Ladon!”Robert Candelaria berdad a purba traha duro y tabata bishita masha hopi entiero den “sombra” di Mike Eman como su compañero durante ultimo aña pa asina busca popularidad y conose e votadornan di AVP mas di serca. Candelaria finalmente a logra aumenta den votos  di 344 pa 684 pues un aumento di 340 votos den un AVP cu a bay atras cu 5000 votos. Si compara esaki den porcentahe Benny Sevinger a cay atras cu 42% ( -42%) mientras Robert Candelaria a crese y bay dilanti cu 98% (+98%). Asina mes a laga Candelaria e candidato di Husticia cu ta bringa corupcion pafor  awor enbuska di un overbruggingstoelage mientras Benny Sevinger (e sospechoso mayor) ta sali di KIA huramenta y cobra su salario di Parlamentario cu un cara di coco  manera  “que yo no fui”.  Aruba 2021 esaki gewoonweg ta inaceptable den e kring nobo di AVP. Tin un cancion popular na Aruba den hubentud ta bisa Bo drumi cu cacho Bo ta lanta cu purga Croes ta termina bisando.