Home » AVP ta perde caso contra Conseho Electoral pa haci reconteo di votonan

AVP ta perde caso contra Conseho Electoral pa haci reconteo di votonan

by Admin
0 comment 49 views

ORANJESTAD – Awe den oranan di mainta, Hues di Corte den Promer Instancia a dicta sentencia den e caso sumario cu tres miembro di partido AVP, Dowers, De Meza y Whatt-Ras a cuminsa contra Gobierno (Conseho Electoral di Aruba) pa haci reconteo.

Aruba Native por a compronde cu e sentencia a wordo manda via mail pa e huristanan di Gobierno y e abogadonan mr. D.Croes y mr. Mohamed cu a representa e miembronan di AVP.

AVP ta para riba pa un reconteo mientras cu Conseho Electoral ta haya cu no tin argumentonan valido pa haci un reconteo. Durante tratamento di e caso a mustra cu di e 58.610 votonan, 890 a wordo declara invalido.

AVP su promer demanda ta reconteo di tur e votonan of subsidiario reconteo di e votonan cu a wordo declara invalido pasobra AVP ta haya cu tabatin irregularidadnan a sosode.

Hues den su evaluacion entre otro ta mustra cu e ta comparti e punto di bista di Conseho Electoral, cu AVP no a presenta argumentonan valido pa haci un reconteo di votonan.

Hues a cuestiona e hecho cu AVP a presenta na Conseho Electoral, potretnan di votadornan di AVP kendenan a saca potret di nan carchi di voto, pa kende nan a vota. Hues ta haya cu esaki ta violacion di secreto di voto cual ta para den Constitucion. E ta haya cu e potretnan aki no por usa como prueba. El a mustra tambe riba e potret caminda e votador a pinta cora e cara di Eman. Esaki na opinion di Hues, ta contra e reglanan con mester yena e carchi di voto y mester wordo declara invalido.

Hues den su sentencia ta conclui cu tur esakinan ta trece cun’e cu e ta haya e decision di Conseho Electoral na su lugar pa no tene un reconteo. Hues a rechaza e demanda di Dowers, De Meza y Whatt-Ras.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio