LO BUSCA UN DIRECTOR NOBO PA WEB CU SALARIO DENTRO DI WEVER-CROES NORM
Varios fraccion den Parlamento siman pasa a dirigi preguntanan na Gobierno di Aruba riba e retiro di directornan na WEB. Oficina di Prome Minister a ricibi carta di fraccion di MEP, RAIZ, Accion 21 y di sindicato SIMAR. Contrario na loke tabata wordo bisa, e fraccionnan aki no a pidi reunion den Parlamento pa trata e tema. Haciendo uzo di e derecho di cada Parlamentario, a base di nos constitucion, nan a dirigi pregunta por escrito pa Gobierno y cu e peticion pa Gobierno contesta nan por escrito. A base di informacion obteni di Utilities Aruba, a contesta cada carta extensamente dialuna ultimo.
Segun e informacion cu Gobierno a duna Parlamento, tur cos a cuminsa cu falta di confiansa den e directornan, debi na varios motibo conoci na e dos directornan y algun di e motibonan aki a ser comunica den e contestacion indica den e parafo anterior. Ambos director a wordo informa di esaki, cu un invitacion pa un reunion cu accionista di WEB, Utilities Aruba NV. Mientras tanto a bin un otro motibo mas acerca, ora a bira conoci cu directiva di WEB – contra di instruccion di accionista y contrario di e sentencia di maart 2021 unda WEB a gana su caso referente e recorte– a duna empleadonan un compensacion di e recorte di salario di 12.6%. Esaki, manera ta conoci, tabata un exigencia di Hulanda pa por duna Aruba sosten di likides. E acionista di WEB a informa e directornan cu lo tene nan responsabel pa esaki tambe.
Despues e directornan a haci un proposicion pa yega na un acuerdo pa termina nan contract, a base di nan contract laboral cu a wordo firma e tempo ey pa sr. Frank Hoeverts, director e tempo ey di Utilities Aruba. Despues di negosacion, partidonan a yega na un suma mucho mas abou cu esun stipula den e contrato laboral. Partidonan a palabra cu lo no duna informacion riba e suma acorda. E accionista di WEB, Utilities, a busca conseho cerca dos diferente oficina di abogado, y ambos a conseha pa yega na un acuerdo cu e directornan pa motibo cu bringa e caso den Corte ta trece hopi mas gasto cu n’e y ta tuma tempo.
Den su contestacion, Gobierno a splica cu segun Statuut di WEB, pa evita un bashi den liderazgo di WEB, temporalmente e hunta di comisario di WEB a apunta e presidente di hunta di comisario pa asumi tareanan di directiva di WEB. Un di su prome tareanan lo ta pa busca un director nobo. Lo publica e vacatura y e proceso lo ta uno obhetivo y independiente, basa riba Corporate Governance Code, mescos cu a tuma luga e.o. den caso di Elmar. Lo busca un director en bes di dos y su salario lo ta den cuadro di e Wever-Croes-norm. Tur esaki lo baha gasto.
Ademas, fraccionnan di MEP y Accion 21 a haci varios pregunta tambe con por garantisa suministro di coriente, ki plannan tin pa cu energia removable y cambio di structura di Corporate Governance. Gobierno a splica extensamente kico e plannan ta. Den un siguiente comunicado lo duna mas informacion tocante di esakinan.