Home Local Centro di Bario Savaneta awor tin su area di lesa

Centro di Bario Savaneta awor tin su area di lesa

SHARE

 

Un palabra di danki na Banco di Caribe pa yuda nos realisa e proyecto aki pa nos muchanan. Un danki tambe na tur donacion di buki. 

Nos por conta cu buki pa tur edad. 

Diahuebs 5 di augustus a habri e area di lesa den Centro di bario Savaneta. Awor nos muchanan por gosa di nan propio area unda cu nan por sinta y lesa un buki. E tema di e area di lesa ta Under the Sea, un tema cu e muchanan mes a escohe. Pa algun luna a traha riba e area aki y finalmente a habri esaki oficialmente. 

E idea pa cuminsa cu un area di lesa a nace ora a ricibi bishita di Elton Lacle di Stichting Hoodchamps cu un donacion di buki pa mucha for di Hulanda. Ela sugeri un Club di Buki pero despues di brainstorm a opta pa cuminsa cu un area di lesa. Semper lo por cuminsa cu un Club di Buki y awo tin un area pa por hasi esaki. 

Ora a hasi peticion riba Facebook pa ayudo di muebles y buki, e reaccion tawata tremendo. Tambe nos a hasi un campanja pa mucha traha un pisca di material recycla y trece esaki Centro. E pisca nan a ser usa den como adorno den e area di lesa. Meta principal pa cu e area aki ta pa stimula e mucha pa lesa y gosa di lesamento. Nos centro ta ofrece un variedad di actividad y ta importante pa sigi hasi esaki. 

Den presencia di sr Giovanni Croes di Banco di Caribe y algun di nos muchanan a habri e area di lesa. Riba potret por mira con esaki a keda y tambe con e muchanan ta gosando di nan mesun area. E lo ta habri diamars, diaranson y diahuebs, te 4 or di atardi. Aparte di buki pa mucha centro tin buki pa hoben y adulto tambe. Esaki no ta den e mesun area di e lesa pero den sala grandi di nos centro. Ora di bishita centro semper por informa pa hasi uso di buki. 

‘Like’ nos Facebook page: Centro di Bario Savaneta y click ‘Follow’ pa asina sigui nos y keda na altura di tur nos actividadnan. Pa mas informacion di actividad, por manda un email na actividad.cbs@gmail.com of tuma contacto cu Roseline via whatsapp na 569-3900. 

Nos Centro ta tene bon cuenta cu tur rekisito stipula pa DVG pa cu COVID-19. Nos ta recomenda pa laba man frequentemente y/of hasi uso di hand sanitizer como tambe pa mantene distancia social. E uso di un tapaboca ta ser recomenda.