Home Politics Wendrick Cicilia di AVP: semper a lucha pa conserva monumentonan di balor...

Wendrick Cicilia di AVP: semper a lucha pa conserva monumentonan di balor historico

SHARE

Julianaschool  mester wordo considera un monumento

 

Wendrick Cicilia di AVP hunto cu lider di partido Mike Eman, a efectua un bishita na Monumenten Bureau pa haya informacion riba e dos edificionan di tnto Julianaschool como Beatrixschool, considera como monumentonan.

Na mes momento dos ex director di Beatrixschool, esta Maurits Taytelbaum como Richard Frank tambe a forma parti di e delegacion cu a sinta cu Director di Monumente Bureau Yvanne Webb hunto cu otro oficialnan di e staff di e departamento aki.

“Nos tabatin e grato placer di por a sinta y combersa cu directora  y diferente experto di Monumenten Bureau pa nos por wordo informa riba e situacion di e dos scolnan cu tin asina hopi balor grandi pa nos comunidad, cu ta Julianaschool y Beatrixschool.

Den un combersacion hopi ameno y cordial nos a comporta informacion relaciona cu desaroyonan acerca di e dos monumentonan aki caminda algun siman pasa nos a inicia un esfuerso pa pone atencion necesario na e dos scolnan menciona, cu ta scolnan hopi special pa centenares di ciudadanonan cu a atende e scolnan aki mescos cu docente- y directornan.

Cu e bishita aki na Monumenten Bureau, nos  a continua cu e esfuerso aki  hunto cu dos ex Director di Beatrixschool den persona di sr Frank  y sr Taytelbaum kendenan tambe ta dunando nan aporte den e esfuerso  pa salvaguardia futuro di e dos monumentonan aki.

Esaki ta un esfuerso colectivo cu ta carga un respaldo di gran parti di comunidad, sigur pa tur esunnan cu tin un gran afinidad cu ambos edificio cu ta edificionan monumental cu tin un balor emocional, un balor historico, un balor cultural pa tur cu tin afinidad cu e dos edificionan aki.

Sin duda cu esaki ta nos responsabilidad pa haci nos esfuerso pa Sali dilanti pa percura pa e edificionan aki wordo reconoci como monumentonan y asina por sigura nan conservacion historico aki y cu e acionnan aki     vocifera e preocupacion di hopi den comunidad cu ta mirando con e edificionan aki ta deteriorando.

For di Monumenten Bureau nos a ricibi informacionnan cu ta di un forma of otro ta trece claridad pero na mes momento tambe un tiki trankilidad pa loke ta e status di Reina Beatrixschool cual ta un monumento oficial protehi, cual a bira parti di e maneho di e departamento di monumento pa conserva e tipo di edificionan aki y nos tin cu elogia y felicita Directora Yvonne Webb y su departamento pa e esfuerso grandi  y positivo aki pa conserva nos patrimonionan nacional.

Na mes momento nos a wordo informa pa Monumento Bureau cu Julianaschool na e momentonan aki ta cumpli cu tur rekisito huridico pa por wordo cualifica como monumento pero ainda no a tuma e decision aki  y tampoco e investigacion necesario no a cuminsa ainda pa por logra conserva e patrimonio nacional aki.

Ta di sumo importancia pa tur esunnan cu ta conserva un amor pa nos patrimonionan nacional pa nos identidad y nos herencia cultural, yuda den e esfuerso pa conserva e monumentonan aki y sin duda partido AVP lo tuma tur procedura y stap necesario pa por salvaguardia esakinan.

Asina mes nos tin un sentimento mixto ya cu e edificion di Julianaschool ainda no a wordo declara un monumento protehi loke ta pone cu e ta core riesgo di por wordo usa pa otro metanan y por wordo cambia den su totalidad di su formato original y asina perde tur su balor monumental.

Di otro banda e situacion aki ta pone cu nos a Sali for di nos bishita na Monumenten Bureau cu ainda mas determinacion pa sigui haci tur esfuerso  pa asina logra pa Julianaschool haya su reconocimento como edificio protehi,” Wendrick Cicilia a declara.