Diahuebs 12 y diabierna 13 di augustus Centro di Bario Savaneta ta ofrece un clinica di futbol y un mini torneo pa hoben di 12 pa 15 aña. Den colaboracion cu FCCA nos a invita hoben nan di 3 bario pariba di brug pa forma nan team. E di 4 team lo ta di hoben nan di Savaneta mes.
Desde Maart nos Centro di Bario ta ofrece diferente actividad pa comunidad di Aruba en particular esun di Savaneta. E programa ta uno hopi varia, tin actividad recreativo, informativo, creativo, virtual y tambe deportivo. Algun actividad nobo ta Kahoot Challenge, Sport en Spel, Club di Mucha y Arte & Teatro den Bario. Nos lo kier mira mas hoben den nos Centro di Bario y cu e meta pa trece mas hoben, nos a escoge pa enfoca riba deporte, den e caso aki Futsal.
Hunto cu Summergames.NL y Everything is Possible nos ta organisa dos dia di actividad pa hoben. Diahuebs 12 di augustus tur team ta wordo busca y treci na Centro di Bario Savaneta. Aki nan lo participa den un clinica di futbol duna pa coach di Everything is Possible. Diabierna 13 di augustus ta sigi e mini-torneo. Pa 6 pm lo reuni tur team pa tira lot, sigi pa e prome wega cu ta cuminsa 6.30 pm. Nos ta invita henter pueblo di Aruba pa bin apoya nos hoben nan y duna aporte na Centro di Bario Savaneta. Bar y cushina lo ta bon surti.
E actividad nan aki no ta posible sin colaboracion y ayudo di Summergames.NL, Everything is Possible. Un danki di antemano tambe ta bay pa FCCA, Reach Your Goal Foundation, Edgar Erasmus di IBISA y sr Azriah Palm pa nan tremendo ayudo.
‘Like’ nos Facebook page: Centro di Bario Savaneta y click ‘Follow’ pa asina sigui nos y keda na altura di nos programa. Pa mas informacion di actividad, por manda un email na [email protected] of tuma contacto cu Roseline via whatsapp na 569-3900.
Nos Centro ta tene bon cuenta cu tur rekisito stipula pa DVG pa cu COVID-19. Nos ta recomenda pa laba man frequentemente y/of hasi uso di hand sanitizer como tambe pa mantene distancia social. E uso di un tapaboca ta ser recomenda.