Home Politics Mike Eman ta sigui cu su racha di mentira: “Ex Biblioteca...

Mike Eman ta sigui cu su racha di mentira: “Ex Biblioteca Nacional, Compleho Ecury, Museo Arkeologico y Huisje Wild ta obranan ehecuta durante Gabinete Oduber”

SHARE

Cada vez e lider di AVP Mike Eman ta sorprende nos cu su mentiranan y esey por ser confirma den su comunicado di e siman aki. Hecho ta cu den pasado Mike Eman y AVP a haci tur intento pa horta e logro di Status Aparte for di nos Libertador Betico Croes alegando cu tabata Henny Eman Sr, Shon A Eman, Henny Eman Jr. y Mito Croes a logra esaki. Alavez algun siman pasa durante e debate di KvK tabata e mesun Mike Eman aki cu a haci otro intento pa horta e logro di scrapmento di fecha di Independencia 1996 for di Nel Oduber bisando cu esaki tabata su logro. Tambe no mester lubida con Mike Eman kier a horta e logro di e 10 molinan di biento na Vader Piet y e plantanan di Reverse Osmosis y Recip cu tabata obranan contundente di ex Prome Minister Nel Oduber.

 

Compleho Ecury y ex Biblioteca Nacional

Awo den su racha di mentira Mike Eman a trece dilanti e siman aki cu tabata su gobierno a percura pa restauracion di e edificionan monumental di Rekenkamer (ex Biblioteca Nacional) y tambe e edificionan di Ecury y Henriquez Complex caminda e Museo Arkeologico y Monumenten bureau ta situa. Aki claramente por mira con Mike Eman kier a horta logronan di Gabinete Oduber ya cu e edificionan menciona y e monumento Huisje Wild a ser restaura durante e periodo di gobernacion di Nel Oduber (2001-2009). E fotonan ta papia pa nan mes!

 

A patch up Bestuurskantoor na 2009

Den su intento pa manipula mente di pueblo Mike Eman kier a haci como sifuera cu e Bestuurskantoor actual a ser restaura completamente bao di su gobierno, siendo cu tur hende sa cu Mike Eman a logra solamente na patch up e Bestuurskantoor aki na 2009. Hecho ta cu na final di Gabinete Mike Eman 2, nan a laga e edificio aki den ruina atras, cu houtluis tur caminda, sushedad di paloma,  kabel y conexionnan electrico destrui y dak y murayanan cu tabata den cay den otro. Pues un engaño total di Mike Eman pa loke tabata e supuesto restauracion di e edificio ñmonumental aki. Pero ta un hecho tambe cu tabata bao di Gabinete Wever Croes 1 a logra restaura e Bestuurskantoor completamente manera debe ser y awe nos tur por mira un hoya di edificio na e sitio aki.

 

Un solo scol construi den 8 aña

Mike Eman den su comunicado a elabora tambe riba e renobacion di diferente scol cu a ser ehecuta durante su gobernacion. Sinembargo e no a ni menciona e cantidad di scolnan cu a ser construi durante su periodo di 2009 pa 2017 ya cu realmente ta un berguensa cu ta 1 solo scol a ser construi den 8 aña, esta Scol Basico Prinses Amalia. Pues net nada compara cu e gobernacion anterior di MEP (2001-2009) caminda a construi den total 6 scol, esta Colegio EPI, Scol Preparatorio Conrado Coronel, Scol Basico Conrado Coronel, Scol Basico Kudawecha, Scol Preparatorio y Basico na Sabana Basora y 11 klas extra pa Maria College. Y pa no papia mes di tur e scolnan cu a ser renoba durante 8 aña pa Gabinete Oduber cu ta hopi pa menciona.

 

Den un siguiente articulo partido MEP lo elabora riba e cantidad di casnan social, complehonan deportivo, casnan di cuido pa nos grandinan, wardanan di polis cu Gabinete Mike Eman a construi durante 2009 pa 2017. Prepara pa yora pareu cu nos!