ORANJESTAD – Awe mainta via video conference, e homber P. a presenta dilanti Hues pa e caso penal cu Ministerio Publico a cuminsa contra dje.
Aruba Native por a compronde cu e caso tabata pro forma. No a trata e caso sino cu Fiscal a bisa di kico ta sospecha P. y a fiha un fecha pa tratamento di caso.
Den sala di Corte tabata presente Hues, Fiscal y abogado di P., mr. Tromp. Tambe tabata presenta e mayornan di P.
VIOLA PAREHA
Fiscal ta acusa P. cu riba 14 April 2021, a viola su pareha, e dama O. Tambe Fiscal ta acusa P., cu riba e mesun 14 April 2021, el a maltrata e dama O., door di tene cu forza, ranca su cabey y dal’e diferente biaha cu mokete na su cabez y pianan.
Fiscal a propone 21 October 2021 pa trata e caso. Hues a bisa cu el a repasa henter e caso y a dicidi cu e mes lo trat’e riba 29 October 2021.
Abogado mr. Tromp a pidi Hues pa laga P. liber pendiente di e caso. El a bisa cu no tin motibo di peso pa sigui detene P. E abogado a mustra cu e pareha tin basta aña cu otro y tin yiunan. El a splica cu loke a sosode 14 April 2021 ta cu door di jaloersi di parti P., O. a bay di acuerdo pa tin relacion sexual den auto. P. tabata jaloers cu O. lo tin un otro y lo a dal O. algun biaha pero no tabatin violacion.
E abogado hasta a mustra Hues cu e pareha tabatin relacion via cellular, mientras cu P. ta sera den KIA. P. mester a sufri e consecuencianan pa tabatin cellular ilegal den KIA. E abogado ta haya cu e pareha nan relacion ta bon y cu no tin motibo pa P. keda sera.
Fiscal a reacciona cu e ta contra pa laga P. liber. Fiscal a bisa cu tin biaha tin caso cu den pareha tin violacion. E ta haya cu tin motibo di peso.
LO SCUCHA DAMA VICTIMA
Hues su decision ta cu e ta rechaza e peticion pa laga P. liber. Hues ta haya cu tin motibo di peso. El a bisa cu esaki ta un caso serio y pueblo lo no compronde cu ta laga P. liber promer cu e caso.
Hues a bisa cu e kier scucha e dama O. ora di tratamento di e caso. Hues lo kier haya sa kico realmente a sosode. El a pospone e caso pa dia 29 October 2021 mainta.