Henter comunidad a keda sumamente sorprendi ora cu a tuma nota di un conferencia di prensa di lider di AVP Mike Eman y na cual ocacion por a mira un cantidad di ex director y ex docente di Juliana school y Beatrix school kendenan tur a para tras di e lider di AVP y sosten’e den su locuranan di semper y e biaha aki ta su ‘preocupacion’ pa cu e estado di e dos scolnan menciona.
Pakico e comunidad a keda sorprendi?
No tin duda cu tur e ex directornan y ex docentenan aki semper a gosa di respet y admiracion den comunidad ya cu pa decadanan largo nan a yuda educa nos yiunan den un forma profesional. Y awe den forma sorprendente nan tur a dicidi di para tras di Mike Eman, siendo cu nan tur sa di e mal mañanan di e charlatan politico aki. Nos di MEP tambe ta reconoce tur e trabaonan cu e ex directornan aki a haci den pasado y ta gradici nan pa e forma con nan a yuda nos yiunan y cu awe hopi di nos yiunan ta sirbiendo nos comunidad den funcionnan hopi importante.
Cual partido tabata na mando na 2014 y 2016?
Sinembargo te ainda ta incomprendibel con varios di e ex directornan aki durante e conferencia di prensa a referi na e 5 pa 7 añanan cu e dos scolnan aki ta cera y cu nos muchanan no por a atende nan lesnan na e scolnan aki. Pregunta ta si e ex directornan aki no ta consciente cu durante e 5 pa 7 añanan aki, esta na 2014 y 2016 Mike Eman mes tabata den gobierno? Si, e mesun ex Prome Minister Eman di e tempo ey cu tabata para net banda di nan durante di e conferencia di prensa y kende rato rato tabata bati riba schouder di e ex directornan aki. Dicon di 2014 te 2017 e ex directornan no a protesta contra e ceramento di e 2 scolnan aki y nunca no a subi caya y exigi un renobacion di inmediato di e scolnan, ya cu e tempo ey Mike Eman tabata landa den placanan hereda y presta? Pues aki por mira claramente cu nan tur a wordo manipula pa Mike Eman, ranca na nan brasa pa nan tambe asisti na e conferencia di locura aki.
Preguntanan cu merece aclaracion
Algun pregunta ta keda den laira y cu mester haya un aclaracion di parti di e ex directornan di Juliana school y Beatrix school:
- E ex directornan aki no ta na altura cu na 2009 e gobierno di Mike Eman a hereda un suma di 970 miyon florin cu a ser laga atras pa Gabinete Oduber? For di e suma aki Mike Eman no por a pone algun miyon florin un banda pa rescata e monumentonan Juliana y Beatrix school y hopi otro mas?
- Nan no ta na altura cu durante 2010 pa 2017 e gobierno di Mike Eman – den tempo bon! – a redobla nos debe nacional door di fia den total 2.2 Biyon di florin extra y ningun cen di e suma fia aki a ser hinca den e 2 scolnan menciona?
- Nan no ta consciente cu debi na e malmaneho financiero di Mike Eman nos pais a cay bao supervision financiero di Hulanda y consecuentemente Hulanda te ainda ta limitando nos inversionnan?
- Nan no ta consciente cu na 2017 Mike Eman a laga e caha di gobierno completamente bashi y cu debenan biyonario cu e gobierno actual mester cuminsa paga, anto cu orguyo?
- Nan no ta consciente cu e gobierno di Mike Eman a bin cu e proyectonan PPP cu tin cu wordo paga ainda den e proximo 30 añanan na un suma di 85 miyon florin tur aña? Dicon Mike Eman no por a hinca placa pa e renobacion di e 2 scolnan aki tambe den e 2 Biyon florin di e PPP-nan aki?
- E ex directornan no por a puntra Mike dicon e no a percura pa recauda fondo pa renoba Juliana y Beatrix school cu ta ubica na Aruba y a prefera pa haci recaudacion pa construccion di 2 scol den exterior?
Finalmente e ex directornan durante e conferencia di prensa tabata para net banda di un ex Prome Minister Mike Eman cu na 2010 a coy 28 miyon florin reserva pa construi un HAVO/VWO scol na Noord y a hinca e suma aki den e proyecto di tram den Oranjestad, siendo cu pa e scol na Noord e tereno, mapa, bestek y te hasta e financiamento tur tabata completamente cla laga atras pa Gabinete Oduber. Pues pa Mike Eman algun tram y su infrastructura tin mas balor cu educacion di nos yiunan y esey e ex directornan di Juliana school y Beatrix school tin cu comprende ‘drommels goed’ y no para tras di e destructor di e pais aki.
