Home Politics Minister Andin Bikker a entrega certificado na participantenan cu a conclui curso...

Minister Andin Bikker a entrega certificado na participantenan cu a conclui curso pa e Dog Control Unit

SHARE

 

 

Recientemente Minister di Husticia, Siguridad y Integracion, mr. Andin Bikker, a otorga certificado na e participantenan cu a cumpli cu e rekisitonan pa por ricibi nan certificado di e “Dog Handling and Capturing Course”.  Empleadonan di Bureau City Inspector (BCI) y di Gele Koorts en Muskieten Bestrijding (GKMB) a sigui e curso aki, den cuadro di e Plan Nacional cu ta atende cu e problematica di cacho riba caya, cual ta inclui un miho aplicacion y cumplimento di e Ley di Cacho. 

 

A intruduci e Ley di Cacho na aña 2015, pero segun Minister Bikker, aunke cu tabata tin bon intencion cu ne, toch e ley a keda falta atencion. Gabinete Wever-Croes a aloca fondo, cambia maneho y asina a introduci un plan structura. Den esey a amplia e tareanan di BCI pa yuda KPA pa ehecuta e Ley, a elimina e “kill cage” door di transforma esaki, a traha un Centro di Control di Cacho nobo y a introduci un Dog Control Unit cu ayudo di Cuerpo Especial Arubano (CEA). Tambe a amplia e autoridad di BCI, pasobra antes ta polis so por a actua. Den e cuadro ey a duna autoridad como buitengewoon agenten van politie na tres ex-polis cu awo ta traha na BCI pa nan tambe por actua den casonan specifico. Por conclui cu Gabinete Wever-Croes y Minister Andin Bikker a duna berdadero contenido na e ley y maneho relaciona cu cachonan. 

 

E curso a start dia 3 di mei ultimo y a sigui durante henter e luna. E facilitadonan di e dia di introduccion tabata veterinario Irene Croes, entrenado profesional di cacho, Tito Laclé y polis di e unidad canino, Dean Nicholson, kende a wordo apunta door di Korpschef pa duna e curso. E resto di e luna e entrenamento a wordo facilita completamente door di Dean Nicholson. 

 

Un total di 16 empleado publico a sigui e curso, pa cual 14 a ricibi un certificado pa nan participacion. Pero cinco a resalta y a ricibi un certificado separa pa nan esfuerso y dedicacion, “certificate of excellence”. 

 

E curso mas bien ta pa e participantenan por anticipa comportacion di un cacho, pa evita un mordi door di miedo. Tambe e cursistanan a siña e importancia di “humane dog handling”. A repasa kico tur tin disponibel riba mercado pa por gara cacho y, teniendo cuenta cu e material limita actualmente, con pa haci miho uzo di e material cu tin. 

 

E Dog Control Unit lo sigui actua riba yamadanan di molester di cacho, por ehempel piki cachonan sin doño na beach cu ta forma peliger pa neishinan di turtuga, of asisti Cuerpo Policial of BCI ora mester extra man. Ta bon pa aclaria cu parti di e trabou ta encera e autoridad tambe cu e unidad ta dispone pa por ehempel parti boet y pone cacho “in bewaring”. Esunnan cu dicho autoridad ta polis y algun empleado cu e status di “buitengewoon agent van politie” na Bureau City Inspector. 

 

Mirando e relacion di colaboracion cu tin actualmente y pa e peso no ta mucho grandi pa e departamentonan cu ta participa, Dog Control Unit ta warda awo riba otro departamentonan di gobierno pa bay di acuerdo pa nan tambe haya e curso. Lo sigui si cu training y instruccion tocante “humane dog handling” pa evita cu e procedura di “catch” ta causa mucho stress pa e cacho. 

 

Na final a entrega un reconocimento special na polis Dean Nicholson pa su empuhe y sosten incondicional na e proyecto aki. Minister Andin Bikker a felicita tur e cursistanan y a expresa su deseo pa hunto nos soluciona e retonan cu tin den comunidad relaciona cu cachonan riba caya y otro tipo di problemanan cu cacho manera negligencia y abuso di animal. El au anuncia tambe di lo propone na Conseho di Minister pa ancra e team multidisciplinario di KPA, BCI, GKMB y otro departamentonan den un decreto ministerial.