Home Local AAA ta sigui contribui na e comunidad di Aruba por medio di...

AAA ta sigui contribui na e comunidad di Aruba por medio di Wings of Hope – Na 2021 famia-, studiante- y partnernan lo ricibi ayudo sostenibel for di Wings of Hope

SHARE

 

ORANJESTAD – Aruba Airport Authority N.V. (AAA) su “Wings of Hope” (WoH) ta orguyoso di por asisti e comunidad di Aruba un aña mas. 

E proyecto pa asisti e comunidad di Aruba a inicia dia 1 di Juni 2020 y awor a bira un di WoH su proyectonan principal pa sigui yuda famianan den necesidad pa motibo di e pandemia. Un di AAA su pilarnan strategico ta sostenibilidad. E aña aki WoH su metanan ta basa riba 5 di e Sustainable Development Goals (SDGs): “Hunger”, “Education”, “Affordable & Clean Energy”, “Environment/Sustainable Airport Community” y “Partnership”. 

Como parti di WoH su meta di ”Hunger”, un total di 50 famia ta ricibiendo asistencia via voucher di cuminda for di Januari 2021 te cu December 2021, cual ta wordo reparti door di Directie Social Zaken (DSZ). E meta di “Education” ta inclui dos parti: Lo asisti un total di 175 studiante cu nan materialnan y uniform pa scol y tambe lo yuda 40 studiante cu nan pago di aña escolar. Como parti di e meta “Affordable & Clean Energy”, AAA a colabora cu Universidad di Aruba pa un competencia sostenibel “Energy Champion” pa scolnan primario. Cada scol cu a participa mester a prepara un plan indicando con nan lo reduci e consumo di energia na nan scol cu por lo menos 20% door di introduci fuentenan di energia nobo pa e scol. E scol ganador lo ricibi un premio di AWG 20,000.00 pa ehecuta nan plan. E ganador lo wordo anuncia Diaranson 28 di Juli, 2021. Pa “Environment/Sustainable Airport Community”, AAA lo enfoca pa crea un of mas areanan “green” na aeropuerto door di reintroduci matanan nativo y vegetacion. AAA ta mira e importancia di partnerships, y ta pa e motibo aki e ta un di WoH su metanan y lo sigui involucra y colabora cu diferente entidad riba varios proyectonan pa fortalece e relacion pa un futuro sostenibel. 

“Nos enfoque ta pa contribui directamente na e Sustainable Development Goals (SDGs) manera estableci pa United Nations. Wings of Hope actualmente ta contribui na 5 di e Sustainable Goals, cu ta asisti y contribui positivamente na e comunidad di Aruba, cual ta un motibo pa ta orguyoso. AAA lo sigui tuma pasonan cu lo haci un diferencia pa un futuro mas sostenibel pa un y tur,” ta locual Director Health, Safety and Sustainability y e lider di WoH Angeline Flemming a bisa.