Manera ta conoci e situacion rond di e dump na Parkietenbos dia pa dia ta empeorando y ya pa decada nan largo ta causando hopi molester y problemanan di salud pa e habitantenan di bario, causando hopi daño na nos medio ambiente, nos flora y fauna, y turismo, sin un solucion y atencion real y profesional di ningun gobernante den pasado.
Den e cuadro aki sra. mr. Anouk C. Balentina LL.Mleg. y sra. Maribelle Tromp M.P.H. a duna un presentacion cu algun puntonan importante y deseonan pa cu e situacion, a enfocá ariba e urgencia, y a duna ideanan pa un solucion immediato y permanente, y tambe a medio plazo. A splica e influencia di e medio ambiente ariba e salud di hende. Hende ta wordo exponi na factornan di riesgo of di proteccion for di su medioambiente cu e ta biba aden. Si tin factornan di riesgo den e medioambiente esaki tin un influencia negativo ariba su salud. E ta wordo exponi na dje tur dia. Medioambiente y salud ta cana man den man cu otro. E medioambiente por wordo adapta di manera cu ta crea factornan di proteccion y asina lo proteha e salud di esnan cu ta biba den un medioambiente sano. Actualmente e medioambiente rond di dump Parkietenbos no ta uno sano y tin bastante factornan di riesgo pa cu e salud di e habitantenan eybanda.
A mustra ariba e gravedad di e situacion actual pa Aruba, pero tambe en mira di e desaroyonan y tendencianan mundial, SDG’s, Climate Crisis, tratadonan internacional y violacionan di leynan relata cu e crimen ambiental cu ta tumando luga na Aruba y Parkietenbos.
Nos ta spera cu Parkietenbos dump, y e puntonan treci dilanti na Formador no solamente lo wordo poni den e acuerdo di gobernacion, pero tambe cu e biaha aki si lo actua y resolve e crisis aki, y cu e gobernacion nobo e biaha aki ehecuta un plan profesional cu experto nan internacional cu ta reconoci mundialmente, hunto cu experto nan local, pa asina remedia e problema aki permanentemente pa nos dushi Aruba. Sra Anouk Balentina ta un hurista y abogado legislativo cu amplio experiencia y experticio y e a concentra su mes pa e ultimo añanan ariba e parti de leynan di medioambiente y tratadonan internacional pa cu medio ambiente. Sra Maribelle Tromp ta un epidemiologo cu amplio experiencia den e area di salud publico. Sra Balentina y sra Tromp no solamente ta profesionalnan riba e tereno di ley y salud pero tambe habitante di Parkietenbos desde cu nan a nace y mediante e reunion cu Formador a sa di duna nan aporte pa un solucion encuanto e problematica rond di e dump na Parkietenbos.