Home » AVP cu caso contra Gobierno pa reconteo di votonan

AVP cu caso contra Gobierno pa reconteo di votonan

by Admin
0 comment 60 views

ORANJESTAD – Awe mainta den Corte di Husticia a trata e caso sumario cu A.Dowers, M.de Meza y Wyatt-Ras di partido AVP a cuminsa contra Gobierno pa e reconteo di votonan.

Aruba Native por a compronde cu AVP su prome demanda ta pa un reconteo di tur urna electoral. Su di dos demanda ta pa haci reconteo di e 890 votonan ilegal.

Ex vice presidente di Conseho Electoral, señor Maduro y e presidente actual Monica Kock tabata presente den sala di Corte. Di parti di AVP, ta solamente Mike de Meza a presenta.

Mr. Croes a bisa Hues cu promer cu cuminsa cu su demanda, e kier puntra si e carchinan di vota a wordo destrui. Ta asina cu Conseho Electoral a duna orden pa destrui e carchinan di voto. Señora Monica Kock a bisa Hues cu door di e caso sumario aki no a destrui nan ainda.

COSNAN STRAÑO CU VOTO ILEGAL
Mr. Croes a mustra cu segun ley di votacion, por demanda reconteo ora ta haya cu e conteo no tabata corecto. El a bisa cu tin 890 voto ilegal. E ta haya cu e cantidad di votonan ilegal ta mas halto cu anterior. E abogado a mustra cu pa 53 voto, AVP no a haya 8 asiento. Na opinion di e abogado, si AVP a haya 8 asiento, esey lo a trece henter un otro panorama.

E abogado a bisa Hues cu tabatin cosnan straño ora di dicidi cual voto ta ilegal of no. El a mustra cu tabatin caso cu pasobra a pasa un tiki e circle cu e potlood cora, esaki ta wordo considera valido pa MEP y pa AVP esaki ta wordo considera invalido. El a sigui bisa cu AVP a presenta 3 mil firma di protesta na Conseho Electoral, pero Conseho Electoral a bisa cu a controla caba e 890 votonan ilegal y no mester bolbe controla. E abogado ta haya cu esaki ta violacion di ley di votacion. El a pidi Hues pa ordena un reconteo di tur urnanan electoral y subsidiario reconteo di e 890 votonan ilegal.

A CONTROLA VOTONAN ILEGAL
E hurista di Gobierno a bisa Hues cu Gobierno no ta mira e interes di AVP pa reconteo. El a mustra cu AVP den su protesta haci na Conseho Electoral no a argumenta esaki. Na opinion di e hurista, si imagina cu AVP a haya e 53 votonan, e miembronan lo keda Parlamentario. El a desmenti cu lo tabatin escogencia den votonan ilegal. El a señala cu un di e votanan cu AVP ta cuestiona cu no ta ilegal, ta cu e cara di Eman tambe a wordo pinta cora. Esey no por y pesey a wordo declara no valido. E hurista ta haya cu den e caso aki no tin interes general mirando cu ya e parlamentarionan a wordo huramenta.

Mr. Croes a reacciona cu tur otro partido, cu excepcion di MEP, a haci protesta. A presenta pruebanan cu cos no a bay bon cu votacion.

Mr. Croes ta haya cu e pintamento di cara di Eman cora ta hustamente pa mustra cu ta pa Eman ta vota. Hues a mustra cu e por ta tambe cu e votador no kier Eman.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio