“Aworakinan nos ta hasta mirando riba ki termino e ambtenaar por entrega menos”
Den su decalaracionnan riba e di 4 dia di reunion cu stakeholders, Prome Minister Evelyn Wever-Croes a elabora riba e reunionnan cu sindicatonan. Gobierno a duna un presentacion di loke ta inclui den e landspakket y loke ta trata e posicion di ambtenaar. A duna un splicacion amplio di full e timeline y kico tur a wordo palabra. E sindicatonan tabata tin algun pregunta cu a logra contesta di biaha.
“Aworaki tin estudionan ta wordo haci pa mira kico ta e miho cambionan cu a wordo proponi pa tin mas eficiencia den e aprato gubernamental. Kiermeen nos no ta na un punto ainda na unda decisionnan a wordo of ta wordo tuma. Nos ta den e fase di studia y ora esaki ta cla y e resultadonan ta conoci e ora nos lo sinta bek cu sindicatonan pa asina tur empleado ta representa den esaki”, Prome Minister a duna di conoce.
Sindicatonan a puntra si ta berdad ambtenaarnan mester bay entrega mas di 12.6%. E contesta ta NO, Prome Minister a enfatisa. “Aworakinan nos ta hasta mirando riba ki termino e ambtenaar por entrega menos. Pues poco poco duna e ambtenaar mas placa bek”.
Riba e tema si ta berdad a keda dicidi cu e edad di pensioen a bira 66 aña, Prome Minister a indica cu esaki tampoco ta e caso. Pa Aruba e edad di pensioen ta yega 65 aña na aña 2024. Esaki at un decision y ley cu e gabinete anterior bou sr. Mike Eman a pasa na 2014 cu den 10 aña lo hisa e edad di pensioen. Esey ta e unico cos cu tin awor. Den cuadro di landspakket a keda acorda cu lo bay haci un investigacion otro aña con fuerte e fondo di pensioen ta. Ora esaki ta cla e ora lo bay papia kico mester haci pa e fondo ta fuerte. Por haci hopi cos berdad pa haci e fondo mas fuerte y un di nan lo ta pa hisa e edad di pensioen.
Un otro pregunta cu sindicatonan tawata tin ta si ta berdad cu ya tur cos a wordo dicidi caba y empleadonan no tabata tin nada di bisa. Prome Minister riba e pregunta aki a enfatisa cu nada a wordo dicidi pa loke ta trata empleadonan publico. Aworaki apenas tin e inventarisacionnan, e estudionan ta tumando luga.
“Nos a palabra cu sindicatonan cu asina un di e estudionan ta cla, nan ta e promenan pa hañe pa asina nos por sinta na mesa y dialoga over esaki tambe pa nos yega na e miho resultado posibel”, Prome Minister Evelyn Wever-Croes a duna di conoce.
