ORANJESTAD – Awe mainta Hues di Corte den Promer Instancia a dicta sentencia den e caso penal cu Ministerio Publico a cuminsa contra e hombernan: R.K., J.C. y A.C.
Aruba Native por a compronde cu Hues a haya nan culpable di a exporta 1.5 kilo di cocaina y a condena nan na menos castigo cu loke Fiscal a exigi.
TRIO GARA CU BOLITANAN DI COCAIN
Fiscal a acusa R.K., J.C. y A.C. cu dia 21 Januari 2021, hunto a exporta 1549,6 gram di cocaina. Tambe cu A.C. lo a maltrata su señora cu un cuchiu.
Nan tres kier a bula bay Miami y miembronan di US Customs a gara nan. Nan a wordo pasa pa Douane y despues nan a wordo pasa pa Polis. J.C. a saca 60 bolita (664,1 gram), A.C. a saca 70 bolita (775,3 gram) y J.K. 10 bolita (110,2 gram).
A.C. a bisa cu R.K. a bin cu e bolitanan y a bisa cu A.C. cu e lo haya 60 dollar pa cada bolita. J.C. a bisa Hues e no tabata sa cuanto placa e lo haya. Tabatin contacto via whatsapp y Polis a constata cu R.K. ta esun cu a organiza tur cos.
Segun R.K. el a wordo menaza door di un Colombiano. Hues a mustra cu for di investigacion ta sali na cla cu R.K. tabata busca hende. Hues a puntra R.K. kende ta e Colombiano. R.K. no kier a bisa kende ta e persona pasobra lo tuma represaya contra dje.
HOMBER TA MALTRATA SEÑORA CU CUCHIU
A.C. a bisa Hues cu e ta arepenti cu el a maltrata su señora. Hues a mustra cu e señora a declara na Polis cu el a mira cu A.C. a yega cas straño. Na dado momento A.C. a pone cuchiu na garganta di su señora y bis’e pa bisa si e tin un otro. A.C. a dal’e cu e plano di e cuchiu na su braza. Hues a mustra cu tin potret di marca na e señora a haya na su braza.
CASTIGO
Fiscal a bisa cu e ta haya legalmente proba cu e trio aki a exporta droga. Tur tres a admiti. Fiscal a mustra cu Ministerio Publico tin un maneho pa cu transportacion di droga. El a exigi pa J.C. 18 luna di prison di cual 6 luna ta condicional cu 2 aña di prueba. El a exigi pa R.K. y A.C., 21 luna di prison di cual 9 luna ta condicional cu 2 aña di prueba.
Hues ayera mainta a bisa cu Corte ta haya R.K., J.C. y A.C. culpable di a exporta cocaina. Tur tres ta castigabel pa exporta mas cu 1.5 kilo di cocaina.
Hues a condena R.K. y J.C. na 18 luna di prison di cual 6 luna ta condicional y 2 aña di prueba. A.C. a wordo na 21 luna di prison di cual 9 luna ta condicional y 2 aña di prueba. Esaki pasobra A.C. ademas di e droga a maltrata su señora.