Den mi funccion como representante di Aruba na UNion Europeo,
Mi a tuma nota di un articulo cu a keda publica día 19 di juli 2021 ariba e portal di un media local, 24 ora, cu e titular: “Edmond Paris di MEP ta scondiendo na Europa pa husticia di Aruba”.
Permiti’mi clarifica un ke otro. E ta di lamenta cu akinan ta trata di un intento di difámacion.
Desde principio di aña 2018 ami ta representado Aruba den Reino Hulandes, den e funcion di ‘Representante di Aruba na Union Europeo’ y mi ta bibando na Den Haag, Hulanda.
Den e rol aki cu ami a ser apunta p’e, e no lo ta posibel pa ami “sconde” pa husticia di Aruba na Hulanda.
Tambe, e media local ta indica den su articulo cu e lider di MEP lo por a informa’mi pa keda Hulanda pa no mester atende cu husticia na Aruba.
Manera cu e media local aki mes a indica den e articulo siguiente cu a sali ayera, 20 di juli 2021, lider di MEP, Señora Evelyn Wever-Croes, a instrui’mi hustamente pa ami keda Hulanda den e periodo di campaña pasobra cu Pais Aruba mester di un representante permanente den Rijksministerraad (“RMR”) na Den Haag.
En particular, pa ariba dia 18 di juni 2021 pa e aprobacion di e di 6 tranche di liquiditeitssteun (prestamo) pa e suma di Afl 181 miyon pa Pais Aruba. Como tambe pa dia 9 di juli 2021 pa e reunion di e topico di geschillenregeling. E ta importante pa Aruba demonstra respet pa cu reunionnan di RMR y pa tin un representate eynan.
Kisas awe mas cu nunca Aruba mester demostra madurez politico y pone posibel interesnan personal un banda pa promove un bon relacion cu Hulanda. Gran parti di e recuperacion economico di pais Aruba ta depende di esaki.
Ami sigur a pone mi interesnan personal un banda, door di por ehempel no forma parti directo (na Aruba) di e campaña electoral na Aruba, pa ami por a keda representa Aruba na Hulanda y na Bruselas.
Mi decision pa ta ausente durante e campaña 2021 pa Parlamento di Aruba, cu consequencia cu mi lo riesga y bay considerablemente atras den voto, tabata un decision personal cu a nace for di e sentido di responsabilidad pa mi pais Aruba.
Ademas, desde april 2021 mi ta ocupa e funcion di ‘Minister Plenipotenciario’ na Hulanda y desde december 2020 mi ta e ‘Presidente di e Comite Ehecutivo’ di OCTA. E dos posicion nan aki mi no por wordo laga desatendi pa bay Aruba den temporada di e campaña 2021.
Eleccionnan pa Parlamento di Aruba no por tabata un motibo pa ami pidi 23 pais miembro di OCTA, Comicion Europeo y otro stakeholders na Europa, pa para cu tur trabow pasobra cu ami lo mester a bai Aruba algun luna pa core campaña politico.
Ta di lamenta cu ta purba di descredita mi persona usando un supuesto ‘buskeda’ pa parti di husticia di Aruba.
Den -ningun- momento ami lo por a hasi algo contra ley of “a beneficia mi negoshi”. Ta trata akinan nada mas di un caso huridico cu ami a entama contra di un banco local y esaki a tuma lugar hopi aña promer cu ami a drenta politica.
E decision di Corte ta publico. Lamentablemente e media local aki ta purba di saca esaki for di contexto y sin tin prueba pa hasi esaki.
Ta di lamenta tambe cu den e articulo di e media local aki, ta menciona mi yiunan, kendenan cu hopi alegria a bin Hulanda pa bishita mi persona, pa nos por pasa tempo familiar hunto, como cu p’ami ta imposibel pa bishitanan na Aruba pa un luna largo door di mi responsabilidadnan na Hulanda / Bruselas.
Manera cu mi ta promoviendo pa hopi aña caba y a ser trecí den varios ocasion durante e campaña 2021 cu a pasa, ta momento pa nos hiba un politica nobo, sin atakenan personal y menos ora cu no tin prueba pa esaki.
Mi ta hasi un apelacion na media local en general pa ta imparcial, informativo y pa contribui na comparti noticia politico di nivel.
Cordial saludos,
Edmond (Eddy) L. Paris, MA, MBA
Representative of the Aruban Government to the EU/
Deputy Minister Plenipotentiary of Aruba
Kabinet van de Gevolmachtigde Minister van Aruba
R.J. Schimmelpennincklaan 1 | 2517 JN Den Haag, NL