Home » Concierto di Leerorkest Aruba a bira realidad Como 300 alumno a demostra nan abilidad musical na ciere di aña escolar

Concierto di Leerorkest Aruba a bira realidad Como 300 alumno a demostra nan abilidad musical na ciere di aña escolar

by Admin
0 comment 83 views

Leerorkest Aruba a pone como 300 alumno a duna nan prome concierto cu nan instrumentonan orkestral. Recientemente, den e ultimo siman di scol, alumnonan di cinco scol piloto Colegio Laura Wernet Paskel, Prinses Amalia Basisschool, St. Paulus School, SOAZA y Graf von Zinzendorf a bini hunto pa toca, canta y baila yen di entusiasmo, expresando nan conocemento musical cu Leerorkest Aruba a brinda na nan. No solamente grupo di alumno a haya AMV cu ta Algemene Muziekvorming, pero pa varios, nan a haya e oportunidad unico pa keda introduci na instrumentonan manera violin, cello, trombone, trompet, clarinet, dwarsfluit. Y asina mes, despues di apenas cuater luna di les di instrumento, un biaha pa siman, nan por a acompaña nan co-alumnonan mas hoben cu a canta cu hopi gana. E tabata un momento unico na unda por a mira e alegria riba e caranan di no solamente e alumnonan, pero tambe e docentenan y di tur cu tabata presente. Un cabezante di scol, Eta Geerman di Laura Wernet Paskel por ehempel a expresa su emocion pa mira su muchanan forma un orkesta real y e impacto positivo cu musica y e esfuersonan di Leerorkest Aruba tabatin riba tur mucha cu ta atende e scol. Es mas a mira un adelanto grandi den resultado escolar en general. “Alumno y docentenan, tur ta contento,” ta locual Geerman a expresa. Su opinion ta comparti pa tur na e otro scolnan cu ta participa den e proyecto piloto di Leerorkest Aruba cu tin e ambicion cu denter di algun aña, tur alumno di scol na Aruba haya e oportunidad pa participa na e programa di musica y instrumento, cu ayudo di diferente docente di musica cu ta traha parttime cu Leerorkest Aruba, pero ta duna 100 porciento di nan energia pa e muchanan.

Staff di Direccion di Cultura tambe tabata presente pa por a experiencia e momentonan special aki y tur tabata inspira.

Leerorkest Aruba a bira un realidad danki na sosten di Ministerio di Husticia y Siguridad di Hulanda cu intervencion di Director di Leerorkest Amsterdam Marco de Souza, kende tabata na Aruba recien pa firma convenionan cu mas scol pa participa na e programa musical. 

Lider artistico di Leerorkest Aruba, Johnny Croes tabata sumamente feliz pa e prome conciertonan aki. Croes no solamente ta e persona cu a acerca Marco de Souza pa Aruba tambe haya un Leerorkest, e ta e motor tras di e programanan digital cu a bira hopi popular tambe. Coordinador organisatorio di Leerorkest Aruba Juliette van Romondt ta percura pa e organisacion y su envolvimento ta danki na e cooperacion di Minister di Enseñansa Rudy Lampe, kende for di principio a sostene e proyecto. Un gratitud special ta bay pa Rotary Club of Aruba cu a percura pa tur mucha tin nan uniform.

Miembronan di directiva di Leerorkest Aruba, Presidente Grace Maduro, Secretario Janice Poeran, Tesorero Stanley Looman y miembro Dilma Arends Geerman tambe a presencia e conciertonan cu a enfatisa e balor di percura cu berdad musica ta pa tur mucha.

Aki por mira un par di potretnan di e conciertonan. Por bishita nos fotogalerij ariba nos website https://leerorkestaruba.org/fotogalerij/ y por download e potretnan desea. Keda pediente pa e video di e concierto!’

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio