Den cuadro cu formacion di Gabinete Wever-Croes II, dialuna a tuma luga e di dos dia di reunionnan entre Partido MEP y Raiz cu stakeholders den nos comunidad riba e tema di finansas, economia, y turismo. Prome Minister Evelyn Wever-Croes a indica cu e reunionnan a bay bon y den bon ambiente.
A reuni cu e asociacion di timeshare pa asina tin un mayor bista riba loke nan ta mira riba e desaroyo di e industria aki y kico pa a nan ta importante pa e gobierno nobo tene cuenta cu ne. Tambe a hiba conbersacion cu ATIA cu ta e organisacion di e doñonan di trabou, cu Camara di Comercio (KVK) y AAA.
Prome Minister a tuma nota tambe cu e organisacionnan aki ta bon na haltura di tur e desaroyonan andando no solamente na Aruba pero mundialmente y cada un a bin cu un lista di sugerencia y paar di punto cu pa nan ta importante pa haña atencion.
E ley laboral na Aruba y e necesidad pa flexibilisa esaki ta e tema cu a bin dilanti durante tur e reunionnan. Tambe a ser comenta cu varios di e comerciantenan den sector hotelero ta buscando awor trahado pa den housekeeping, houseman etc y no ta hañando hende na Aruba pa esaki. Esaki ta haci cu lo mester pone extra atencion eynan di esnan cu por ehempel ta den FASE of na DPL pa asina yega na e personanan aki pa ocupa e trabounan aki y asina contribui tambe na e desaroyo economico.
Cu e sector di turismo a papia riba e tema di medio ambiente ya cu naturalesa y medio ambiente ta importante pa cu nos turismo. Tambe nos a dialoga riba e tipo di turismo cu nos kier wak aki na Aruba. E calidad vs cantidad.
“Esakinan ta basicamente e liñanan cora cu a bin dilanti den e diferente encuentronan, tambe e topico di reforma fiscal a wordo treci dilanti door di ATIA y Camara di Comercio. Nos a brainstorm riba e diferente puntonan cu tin riba mesa aworaki. COHO y landspakket a bin padilanti y AAA a trece algun tema specifico di e compania mes cu mester haña atencion.
E reunionnan aki a bay bon. Hunto cu RAIZ nos a tene e reunionnan aki entre e integrantenan di ambos partido y nos a haci diferente palabracion pa continua cu e diferente stakeholdersnan aki unabes e Minister encarga ta apunta”, Prome Minister a duna di conoce.
Despues di cada reunion, e representantenan di ATSA, Luigi Heredia; ATIA, Trystan Every; KVK, Omar Tromp; AAA, CEO, Joost Meijs tawata presente y cada un a trece nan input di loke nan ta haya ta imporatante pa e gobierno nobo tene cuenta cu ne den e siguiente gobernacion pa e proximo 4 añanan. Despues di cada seccion di 45 minuut, cada representante a haya turno pa duna nan declaracion na prensa y duna e oportunidad pa prensa haci pregunta.
