Home » 18 luna di prison pa mucha di 16 aña cu a hinca su opa mata

18 luna di prison pa mucha di 16 aña cu a hinca su opa mata

by Admin
0 comment 109 views

ORANJESTAD – Awe merdia, Corte di Husticia di Aruba a dicta sentencia den e caso penal cu Ministerio Publico a cuminsa contra e mucha E.

Aruba Native por a compronde cu e mucha E. di 16 aña cu a hinca su opa Alex Tromp di 77 aña mata riba 6 Januari 2021. E sentencia a tuma lugar via video conference caminda Hues a bisa cu mester determina si aki ta trata di un caso di asesinato of mata. Hues a mustra cu Fiscal ta papia di asesinato y abogado ta papia di mata. Hues a bisa cu ta un hecho cu E. a kita bida di su opa. Awor mester determina si E. a planea esaki of door di circumstancia el a haci’e.

Hues a bisa cu for di tratamento di caso ta sali na cla cu dia 6 Januari 2021, den oranan di anochi, E. a hinca mata su opa. Tambe for di investigacion ta sali na cla cu E., durante cu e tabata mas jong, a hay’e confronta cu hopi casonan lamentoso. Tempo e tabata biba serca su padastro, el a mira con su padastro tabata maltrata y grita su mama. Esey a conduci cu E. y mama a bay biba serca e opa. Ta asina cu e opa, tabata hopi malo. E tabata sufri di dimencia, o sea ta kere cosnan cu en realidad no ta asina. Door di e enfermedad aki, e opa tabata kere cu su yiu muher, mama di E., tabata su señora. E acusado E. tabata hopi preocupa cu su opa. E opa tabata jaloers riba su yiu muher, mama di E. door cu e ta kere cu ta su señora. E. a confronta hopi gritamento di e opa.

Dia 6 Januari 2021, e opa tabata hopi rabia riba e mama di E., kende a sali e anochi ey. Ora e mama a bolbe cas, e opa den su rabia a tira un stoel riba mama di E. E mama tabata spanta y a lock su porta di camber.

Door di tur e situacion aki, E. e anochi ey, kier a mata su mes. Hues a bisa cu e ta tristo pa scucha cu un mucha asina jong kier mata su curpa. Esaki door cu e no por a soporta mas e situacion na cas. E. tabata dicidi cu e ta bay mata su mes y a cana bay direccion di camber. Diripiente el a bay riba su opa y hink’e.

NO CULPABLE DI ASESINATO
Hues a bisa cu durante tratamento di e caso, Fiscal a expresa cu no ta kera cu E. kier a mata su mes. E potretnan cu Polis a saca, no tin marcanan di corta na su pols. Hues a mustra cu e agentenan cu a bay atende e asistencia, a declara cu E. tabatin corta na su pols robez.

For di investigacion di Reclasering ta mustra cu E. tin un 1 aña cu e tabata corta su mes. Esey ta indica cu e tabatin intension di haci algo cu su mes.

Hues ta haya cu E. no tabatin suficiente tempo pa pensa kico realmente e kier haci. Hues a bisa cu psycologo tambe ta mustra cu E. a haya un impulso hopi severo.

CULPABEL DI MATA
Na opinion di Hues, esey no por wordo considera asesinato pasobra ningun momento E. a pensa kico e ta haci.
Hues ta haya E. culpable di a mata su opa. Hues tambe a bisa cu E. mes a expresa cu ta duel e masha cu el a mata su opa.

SENTENCIA
E caso aki a shock henter comunidad. Hues a bisa cu psycologo y psychiater a constata cu e chens pa E. bolbe haci algo asina ta hopi chikito. Pero ta importante pa E. haya ayudo y guia. Psychiater ta haya cu E. ta menos responsabel pa su actonan. Hues a condena E. na 36 luna di prison di cual 18 luna ta condicional cu un tempo di prueba di 2 aña. Hues a stipula cu durante e 2 añanan di prueba, E. mester sigui guia di Reclasering, hasta si esey ta nifica cu e mester sigui tratamento di psycologo of psychiater.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio