Home » Minister Bikker a firma acuerdo di cooperacion cu Customs and Border Protection di Merca

Minister Bikker a firma acuerdo di cooperacion cu Customs and Border Protection di Merca

by Admin
0 comment 67 views

 

E acuerdo ta significa un adelanto grandi pa seguridad di frontera di Aruba

 

Recientemente Minister di Husticia mr. Andin Bikker a firma un ‘Letter of Intent’ cu e Customs and Border Protection (CBP) di Merca. E acuerdo di principio tin tres dimencion. 

E prome dimencion ta cu e systemanan automatiza di control y maneho di nos frontera di Aruba den forma di e Radex, online ED-Card y pronto e ESTA di Aruba, lo por conecta riba e Automated Targating System (ATS) di Merca (https://www.dhs.gov/publication/automated-targeting-system-ats-update). ATS ta un systema automatisa cu ta compara informacion di viahero, carga y di transferencia di ambos, cu e basenan di data di instancianan cu ta mantene y enforsa leynan, y ta haci analysis di seguridad (‘risk-based scenarios and assessments’). Asina e lo yuda departamentonan cu ta controla y proteha nos frontera, manera Inmigracion Aruba, KPA, Douane, VDA, NCTVI y DIMAS, pa tin acesso na informacion mas amplio pa por eherce nan trabow. Por ehempel ora cu activa e ESTA di Aruba, Inmigracion Aruba y DIMAS lo por haci uso di e base di data di Merca pa por opera e ESTA di Aruba. Douane por ehempel lo ta bay tin mas informacion riba mobilisacion di carga y containernan cu ta destina pa yega Aruba.

 

Un di dos parti di e acuerdo di principio ta e uzo di ‘biometria’ a base di articulo 22a nobo di e Ley di Admicion y Expulsion (LTU), cu ta yuda pa e proceso di screening pa admicion di turista wordo amplia cu e control di su identidad a base di su biometría (potret digital y fingerprint), cual lo aumenta e instrumentonan pa e departamentonan menciona ora di screening pa dicidi si ta admiti un viahero, y na mes momento percura cu e turista por ta mas lihe na su hotel y riba beach, pa por disfruta di loke nos isla tin pa ofrece.

 

Finalmente e acuerdo di principio ta duna espacio pa Aruba haya mas asistencia den reconoce documentonan oficial, pues pa gara esunnan cu ta purba pasa cu paspoort falso.

Mester menciona cu e acuerdo aki den opinion di Minister Andin Bikker ta uno historico ya cu Merca ta e mercado principal di nos turismo. E mandatario tin bastante tempo caba trahando riba e tema. E Minister a propone y logra haci algun cambio den ley den e LTU (AB 2018 no. 70) y den e Toelatingsbesluit (AB 2020 no. 94), pa por tin un base huridico moderno y amplio cu ta cumpli cu exigencianan internacional, y por aplica e uzo di tecnologia moderno den control na nos frontera.

 

Pa Minister Bikker, e meta primordial ta pa por tin miho control y seguridad, banda di eficiencia y rapidez pa e turista por pasa door di e proceso di control mas pronto cu ta posibel, pa hopi lihe despues di aterisa na Aruba e por ta na su hotel of beach, disfrutando di loke nos isla tin di ofrece. 

 

Manera menciona, Merca ta e mercado principal di nos turismo, pues e mandatario ta convenci cu hopi mas acuerdo di cooperacion lo sigui entre e departamentonan Mericano y di Aruba, den interes mutuo pa garantisa siguridad di bishitantenan di ambos pais.

 

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio