Home Politics Prome Minister Señora Evelyn Wever-Croes: Proceso pa forma Gabinete Wever-Croes II:...

Prome Minister Señora Evelyn Wever-Croes: Proceso pa forma Gabinete Wever-Croes II: REUNIONNAN CU STAKEHOLDERS DEN E AREA DI SALUBRIDAD A CUMINSA

SHARE

Desde cu Prome Minister Señora Evelyn Wever-Croes a wordo nombra como Formador di e gobierno nobo, mesora e trabounan pa yega na formacion di Gabinete Wever-Croes II a cuminsa. E proceso pa yega na un gobierno stabil ta wordo parti den 4 diferente aspecto. (1) Acuerdo di gobernacion entre Partidonan MEP y RAIZ. (2) Reparticion di e carteranan. (3) Apunta Ministernan y screening. (4) Reunionnan cu Stakeholders. 

 

Diabierna 16 di juli a cuminsa cu e aspecto di formacion number 4, reunionnan cu Stakeholders den comunidad; cu gremionan comercial, gremionan sindical, cu representantenan di area social, salubridad, area di naturalesa y desaroyo economico, pa scucha wak kico nan ta haña ta importante pa e gobierno nobo tene cuenta cu ne den e siguiente gobernacion pa e proximo 4 añanan. 

 

E prome area riba schedule tawata salubridad. Cada reunion a dura 45 minuut. Despues di cada reunion e representante di cada area a duna un declaracion y prensa por a haci pregunta of duna remarke. 

Pa e area aki, a duna declaracion:

 

Sr. Edwin Jacobs, SVB/AZV 

Dr Vroegop, HOH

Sra. Van den Oever ASHA

Dr Rajnherc, IMSAN

Dr.van Galen, Respaldo

Dr. van Trigt, HAVA 

Gina Maduro, Sindicato ABV 

 

“E reunionnan a bay bon. E proceso pa forma e siguiente gobierno ta hopi serio y importante y mester tuma su tempo. Como formador, mi ta reuniendo desde awe cu diferente stakeholders den nos comunidad y ta gradici cada un cu a honra nos invitacion y sinta cu mi den e etapa importante aki di formacion di e miho gobierno cu Aruba por tin den e temponan aki”, Prome Minister Evelyn Wever-Croes a duna di conoce. 

 

E reunionnan ta continua den e dianan nos dilanti te ora cubri cu tur e areanan ariba menciona.