Home Corte 8 luna di prison pa mucha di 15 aña cu a hinca...

8 luna di prison pa mucha di 15 aña cu a hinca homber mata

SHARE

ORANJESTAD – Awe mainta den sala di Corte, via video conference, Hues a condena un mucha pa a hinca un homber mata riba e anochi di 31 December 2020 pa 1 Januari 2021. E mucha M.(16), tempo di e lamentable incidente, tabatin 15 aña.

Aruba Native por a compronde cu Hues ta haya legalmente proba cu M. a hinca e homber difunto Ras cu un cuchiu den pecho cu consecuencia cu el a fayece. Hues a bisa cu investigacion ta mustra cu e hinca a perfora Ras su curazon cu a causa su morto.

DEFENSA PROPIO?

Hues a duna su opinion riba loke M. a bisa cu el a actua den defensa propio pa defende su mama y su ruman muher chikito. Na opinion di Hues, si mira declaracion di M. su mama y tio y otronnan presente, no por mira cu M. mester a defende su mes. Si ta asina cu mama di M. y Ras tabatin un discusion. Esnan presente no a mira esaki como un menaza. E tio di M. a intermedia y a calma e discusion un poco y Ras tabata bayendo bek pa su auto ora cu el a wordo hinca door di M. Hues tambe a mustra cu mama di M. a declara na Polis cu e no tabata sinti su mes menaza door di Ras. Hues a conclui cu tur esaki no ta mustra cu M. mester a defende su mes pues no por papia di defensa propio.

CASTIGO HUBENIL

Hues a bisa cu pa cu e castigo, el a tene cuenta cu e edad hoben di M. y cu M. tabata pensa cu e tabata defende su mes. Hues ta haya M. culpable di a mata un persona y esey ta castigabel. Hues tambe a tene cuenta cu e tempo ey M. tabatin 15 aña. Segun e ley penal di Aruba, si e mucha no tin 16 aña, no por duna castigo mas cu 12 luna. Ley ta mustra cu un mucha bou di 16 aña, no ta compronde kico el a haci.

Hues a sigui bisa cu e ta tene cuenta cu e raport di Reclasering y e raport di psycologo cualnan a wordo trata den Corte tambe. Reclasering ta conseha, cu mirando cu Aruba no tin instituto hudicial pa hubentud, pa asina obliga e mucha cu e mester haya guia. Hues ta haya esaki lamentable, pasobra tanto Reclasering como psycologo ta haya cu M. mester ayudo. Nan ta mira cu e chens ta grandi, cu si M. no haya e guia necesario, e lo bolbe haci algo mesun cos.

Ta asina cu Fiscal a exigi 12 luna di castigo y guia obligatorio condicional. Hues a splica cu e ley penal di Aruba ta mustra cu un castigo obligatorio pa sigui tratamento no por ta condicional manera si ta e caso na Hulanda.

Hues a bisa cu e lo duna un parti di e castigo hubenil condicional pa asina crea e posibilidad pa guia M. Hues a condena M. na e castigo maximo di 12 luna di prison, di cual 4 luna ta condicional cu 2 aña prueba. Na e tempo di prueba, Hues a pone e condicion special, cu M. ta cay bou guia di Reclasering. Tambe cu si Reclasering haya cu M. mester sigui guia di psycologo y un guia pa regla agresividad. Hues a aproba e demanda di daño di famia di Ras cu ta 5200 florin, pa e gastonan di entiero.