Recientemente Banco Central di Aruba a laga haci un estudio di e estado di e situación socio-economico di bienestar di hogarnan na Aruba, “Financial Wellbeing of Households”. E estudio di Banco Central ta confirma e pobresa cu nos a mira den comunidad e líder di fracción di AVP mr, Mike Eman ta expresa. Eman ta cita e e relato riba e rapport: “e resultadonan ta confirma cu mas cu 60 porciento di famianan den nos comunidad a keda afecta door di perdida di entrada”. Banco Central ta confirma cu esaki un caida grandi compara cu dos aña pasa. “Esaki a afecta no solamente e poder di compra di hogar sino tambe e bienestar general di famia”.
Mr. Mike Eman ta haya hopi preocupante tambe cu e empobrecimento a haci e repartición di entrada na Aruba hopi mas malo. Nos a sclama contra di redoblacion di BBO y otro medidanan cu a afecta poder di compra y tambe a pidi pa socialisa e subsidio di salario pa esnan di menos entrada haya 100% cubri pa evita e empobrecimento y empeora e equidad den distribución di entrada na Aruba. Pero no tabata tin oído. Awe Banco Central ta alarma “cu e diferencia den entrada entre hogarnan a bira mas grandi y cu e nivel di probresa relativo a crece”.
Eman ta bisa cu e pobresa ta alarmante. Nececidad pa ayudo pa jega na cuminda a yega un record na Aruba. Eman ta cita e relato riba rapport di Banco Central: “pa casi 1 den cada 3 hogar na Aruba (29 porciento) e tabata dificil pa nan famia cumpra cuminda den ultimo 6 luna”.
E efecto di e perdida di poder di compra ta hopi penoso pa nos hogarnan, Eman ta accentua y ta mustra cu esaki tambe ta afecta e economía en general. Aki tambe e líder di AVP ta cita un parti di e rapport di Banco Central. Eman ta splica cu hopi bez e a mustra riba e hecho cu kibrando e poder di compra cu medidanan e gobierno ta kibra tambe e economía di Aruba. E ta bisa cu hopi vez institutonan cu ta conseha gobierno riba tema di reducción di déficit no ta mira e corelacion entre poder di compra, economía y entrada di gobierno. Eman ta haye importante pa mira awor den e estudio di Banco Central un afirmación di e importancia di poder di compra y consumo local riba economía. Eman ta cita: “Household consumption is readily recognized as one of the key drivers for economic development. More than half of Aruba’s gross domestic production (GDP) depends on the financial position and wellbeing of the households”. Matando e poder di compra manera nos ta mira den e serie di medidanan pa bin ainda lo sigui empobrece Aruba y lo keda debilita un motor principal di nos economía cu ta e consumo di nos hogarnan cu ta depende di nan situación financiero. E hecho cu no tin perspectiva pa mehoracion caba ta crea preocupación y stress mental den nos horagnan, e líder di AVP mr. Mike Eman ta bisa. Esaki tampoco ta yuda recuperación di e factor consumo den nos economía e ta agrega mustrando riba e cifra di 47% den e estudio di Banco Central cu ta bisa cu nan ta preocupa cu nan finanzas pa e siguiente seis lunanan aki.