Home » Jufrou Glenda Beatriz Krozendijk *18 januari 1953 – †13 juli 2021 Vision profesional: “ENSEÑANSA MESTER EDUCA Y EMPODERA CADA ALUMNO”

Jufrou Glenda Beatriz Krozendijk *18 januari 1953 – †13 juli 2021 Vision profesional: “ENSEÑANSA MESTER EDUCA Y EMPODERA CADA ALUMNO”

by Admin
0 comment 125 views

Ariba un atardecer melanchólico di un diamars, 13 di juli 2021, Sra. Glenda Beatriz Krozendijk a habri su halanan y bula bai keiro. Contemplando for di laira su sitio natalicio y a la vez su morada pa decadanan largo: Sero Biento y vecindario.

Mescos cu e famoso poema ‘Atardi’ di nos gran Joseph Sickman Corsen (1853-1911) cu ta describi su atardi, esaki tambe tabata un atardi ‘bunita’ na Sero Biento 43-B, na momento cu solo a cuminsa baha, Glenda Beatriz a hala su último rosea pa rond di 18:07 or.

 

Glenda Beatriz, cariñosamente pa hopi di su alumno-/studiante yamá ‘Jufrou Glenda’. Jufrou Glenda pa di tres vez mester a hiba atrobe un lucha fuerte pa su bida. Un lucha cu Jufrou Glenda ya a hiba na dos otro ocasion, esta na 2006 y na 2011 contra cancer. Na ambos ocasion, Jufrou Glenda a sa di domina su malesa. Lamentablemente e último bataya, desde October 2019 pa awe, Jufrou Glenda mester a rindi…., sinembargo e último palabranan di Jufrou Glenda na su famia y amistadnan, cu a compañ’e te na e último ora tabata: “Ami no a muri, p’esey mi no ta bisa ayo. Mi ta djis habri mi halanan y bula bai keiro. Boso ta keda atras. No laga tristeza domina boso. Keda uni un cu otro pa mi alma. Esey lo ta un alegria. Recorda mi cu hopi amor y kada dia ‘CELEBRA BIDA’”.

 

Famia de Sousa Fernandes Perna-Krozendijk

 

Jufrou Glenda a lanta na Sero Biento y a bishita Maria School y Colegio San Antonio na Santa Cruz. For di chikito, Jufrou Glenda tabata aspira pa bira maestro di scol. Asina tambe Glenda a inicia na 1972 su carera profesional como Kleuterleidster na Trupial Kleuterschool. 

Na 1973, Glenda a obtene su Hoofdakte (APA) y na 1977 su Diploma di Vakstudie Speciaal Onderwijs (Nederlands-Antilliaanse Academie). Banda di fungi como (Hoofd)kleuterleidster (1972-1977), Glenda a traha tambe como pedagogisch-medewerker na Departamento di Enseñansa, seccion Aruba (Pedagogisch-Didactisch Bureau, 1975-1976).

 

Mientrastanto e flechanan di cupido ‘Glenda’-‘Jose’ a cruza otro durante e añanan 1974/75, consolidando esaki c’un rinchi oro-i-ruby na augustus 1975. Na augustus 1977, Jufrou Glenda y Meneer Jose a bai Hulanda pa sigui studia. Na 1981 Jufrou Glenda a gradua na Academie voor Sociale en Culturele Arbeid (Bachelor) na Groningen (1981) y despues na 1984 a obtene su titulo di Master na Instituut voor Hoger Pedagogisch Onderwijs, instituto liga na Rijks Universiteit Groningen.

 

Na 1980 (mei, 27, Groningen y juni, 07, Santa Cruz) a celebra e enlace matrimonial entre Jufrou Glenda y Meneer Jose. Cu hopi amor y pasion, esaki a conduci na 28 di juni 1982 na nos principe Jorge-Alberto (Albee) y na 26 di juli 1988 na nos princesa Elizabeth Beatriz (Eliza).

 

Ta bon pa remarca, cu Glenda desde chikito a sobresali den diferente deporte: volley, atletiek, badminton, voetbal, tennis y softball. Tanto na Aruba, como na Hulanda, Jufrou Glenda a destaca principalmente den softball, formando parti di e seleccion di softball pa Aruba/Antias y tambe e seleccion di Hulanda; tambe Jufrou Glenda a ser nomina pa e corant ‘Nieuwsblad voor het Noorden’, como e mihor shortstop femenino di Noorden (Groningen, Friesland, Drente). 

 

Pa esnan cu conoce Glenda bon, sa cu Glenda ta un ferviente fan di Rafael Nadal, di Cristiano Ronaldo y ………. di Jeon Alric de Sousa Fernandes Perna (nieto stima di Jufrou Glenda).

 

Na Hulanda Glenda a traha como Schoolmaatschappelijkwerker na Sociaal-Pedagogische Dienst (Groningen, 1980-1984). Na 1984 (augustus-oktober), Jufrou Glenda y famia a regresa Aruba. Jufrou Glenda a continua su carera profesional como Director na FAVI (1985-1993). Despues di a labora pa mas di 13 aña den sector social, Jufrou Glenda a switch atrobe pa sector di ensañansa, prome como docente na EPI, sector Salubridad y Servicio (1994-1999) y despues como docente na IPA (1999-2017). Tanto na Hulanda (Groningen) y na Aruba, Jufrou Glenda tabata hopi activo como boluntario, principalmente den e areanan social-cultural. Aunke Jufrou Glenda a baha na 2013 cu penshun, Jufrou Glenda a sigui contribui cu su expertisio y experiensia pa cu e sectornan di enseñansa y cultura.

 

Como esposo, mi ta conoce Jufrou Glenda, ya pa mas di 46 aña como amiga, esposa, mama di Albee y Eliza y tambe como colega di trabao (IPA). Como persona, Glenda ta hopi alegre y espontaneo, c’un curason hancho habri pa un y tur y cla pa yuda su prohimo. Jufrou Glenda ta un persona di principio, tanto spiritual, como humanitario: Glenda ta desaproba cualquier tipo di inhusticia y ta sali na vanguardia di e derechonan universal di hende, muy en particular di mucha y hende muher.

Como colega di otro, nos ta comparti un vision pedagogico hopi similar: “Enseñansa mester contribui na desaroya cada alumno/studiante cu conocimento y habilidadnan pa nan por defende nan mes awe y mañan, na unda cu nan por ta na mundo. Ademas, mester empodera cada alumno/studiente mentalmente di tal forma cu nan por para riba nan propio pia como adulto independiente: propio autonomia, propio responsabilidad y auto-determinacion”.

 

Como mama, Glenda a demostra su habilidadnan pedagogico y domestico; segun mi, Glenda ta e consehera principal pa Albee y Eliza, igualmente pa mi, como tambe pa hopi otro di su famia, amistadnan y conocirnan. 

 

Semper Glenda a sa di balansa su responsabilidadnan domestico (priva) y esunnan profesianal (publico). Como profesional, Glenda ta un persona hopi competente, critico y responsabel: tanto colega como alumno/studiante, semper por conta riba su experticio y sosten. Glenda semper tabata bon prepara y cla pa duna un man na un colega o studiante. Glenda ta un di e professional-nan cu sigur ta bai e ‘extra mile’.

 

Como yiunan, nos kier expresa con hopi suerte y aprecio nos tin y con orguyoso nos ta, pa tin un mama asina cariñoso, inteligente, positivo y fuerte manera esun di nos. Desde e dia cu nos a nace, mami tabata tey na tur momento den nos bida. 

 

Eliza: Hasta si Oceano Atlantico ta sepera mi, semper mami tey pa duna mi sosten y amor incondicional. Con hopi pasenshi mami semper a demostra pa “mi kier” y con hopi sosten mami a duna mi den momentonan di “crisis”. Dia mi a perde mi ‘Dodo’ (of ora e la wordo laba den wasmachine) of ora mami tabata bin den kamber serca mi ora tin lamper cu strena ta sacudi e cas, y ami bou klechi ta tembla di miedo. 

Ora mi a bai biba na Hulanda, mami a bai di Maastricht te cu Groningen pa despues subi e mes’un trein pa bolbe bek Maastricht, e mes’un dia: un viahe den trein cu practicamente e mes’un duracion bulando di Hulanda pa Aruba, kisas hasta mas largo (ora Nederlandse Spoor-wegen (NS) tin storing y/of werkzaamheden riba spoor). Tambe ora mi a haña e noticia cu mi a wordo uitgeloot pa mi estudio di medicina. But have no fear, super mom is here!

 

Mi a siña hopi di mami como mama, maestra, amiga, deportista, coach, believer, survivor y como hende muher. Mami (igualmente Papi) semper a apoya mi den tur aspecto di bida y na diferente nivel, di peuterschool te cu Universidad; di krijt pa poppenkast, di kleurboek pa leesboek, di spreekbeurt pa opstel, di poëzie pa werkstuk, di project pa presentatie, di gesprek pa dissertatie. 

Mi a siña cu den bida bo no por haña tur cos cu bo kier. Si bo kier algo, bo mester tuma initiativa y traha duro p’e. Temanan manera: discriminacion, emancipacion, igualdad y diversidad semper a wordo discuti abiertamente na cas. Cosnan cu semper a keda rasona den mi y cu a forma e persona cu mi ta awe. 

 

Albee: Den mi caso, algo masha unico: un yiu cu ta haya “dobel tipo di educacion”: educacion di cas/parenting (Mother Glenda), pero tambe educacion di scol/schooling (Teacher Glenda). Ademas mi a bin compronde di otro colega-studiante, cu nos (Albee & Eliza) mas cu’n biaha a fungi como ‘ehempelnan’ den e lesnan di Pedagogia di Teacher Glenda, como tambe den e lesnan di Teacher Jose. Bueno, nos ta spera cu bo(so) lesnan di e forma ey, tabata mas ilustrativo y educativo pa e studiantenan.

 

Manera Eliza tambe a comenta, pa nos como yiu y como persona, nada no ta mas valioso cu por mira y sinti con hopi amor mami tin pa nos. Danki pa tur e ‘extra miles’ y e sacrificionan cu mami a hasi pa nos y pa percura cu semper nos por a realisa nos deseonan y cu nos necesidadnan den bida. 

Mami a cria nos cu asina hopi amor, cuido y dedicacion, pero tambe dunando nos semper e espacio pa nos por explora y conoce nos mes mihor. Si nos a haci fout, mami semper a guia y yuda nos ora mester, na mes momento dunando nos e confiansa pa nos mes siña resolve nos problemanan. Mami a stimula nos pa semper para habri pa otro hende nan punto di bista y opinion, pa semper sea critico y pa ta independiente, pero tambe semper pa respeta otro y coopera cu otro. Tambe pa ta nos mes, y pa semper tene compasion y sea empatico cu nos prohimo. 

Eliza/Albee: Danki pa duna nos bida y danki pa duna bida ‘bida’, cu hopi amor.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio