Home Sports Exitoso Aruba Summer Karate Championship 2021

Exitoso Aruba Summer Karate Championship 2021

SHARE

Oranjestad:

Diasabra 10 di juli ultimo a tuma luga e “Aruba Summer Karate Championship 2021” na Centro Deportivo Frans Figaroa na Noord cu participacion di 60 karateka. Invitadonan special presente tabata e.o señora Nicole Hoevertsz y team di Comite Olimpico Aruba, señor Gerald Franca di Aruba Sport Unie y señor Felix Piña. A start e campeonato yamando e seleccion di Aruba Karate Bond dilanti pa duna nan un merecido aplauso pa nan recien participacion na Corsow den e campeonato ‘ABC’, unda Alejandro Gonzalez Lujan y Juan David Velasquez a trece 3 medaya di oro pa Aruba. A continua cu e presentacion di Juan David Velasquez cu e ‘kata’ (esta combate imaginario) yama ‘kanko-shu’. 

Instructornan den accion

Pa sorpresa e publico y pa motiva e karatekanan di Aruba, a yama e instructornan di karate, ‘sensei’ Felix Tromp (Japan Karate-Do RyobuKai Aruba), ‘sensei’ Alberto Gonzalez (Shotokai Aruba- dojo Shocokan) y ‘sensei’ Gustavo Velasquez (Dojo Jin Sei Kan) a demostra e ‘kata basadai’ pa cual nan a ricibi un caluroso aplauso. Despues a finalisa e apertura cu presentacion di un ‘kata’ ehecuta door di famia Velasquez.  

Categoria

Aruba Summer Karate Championship 2021 tabata tin den total 10 categoria di ‘kumite’ (pelea/bringamento unda e participante ta ehecuta diferente tecnica contra su contrincante) y 12 categoria di ‘kata’ (combate imaginario di e participante unda ta evalua su habilidadnan tecnico). Hopi bunita tabata e curashi di e muchanan mas chikito (rambuho) pa ehecuta nan ‘kata’ e mas miho cu nan por. Cada un a ricibi un medaya di participacion. E karatekanan mas grandi a combati den nan respectivo categoria y mester menciona cu tabata tin algun hopi fuerte mes. E dia a finalisa 4or di atardi cu tremendo aplauso pa tur karateka. 

Resultado

Directiva di Aruba Karate Bond ta hopi contento cu e campeonato y e resultadonan di e campeonato. E tabata un 1e salida despues di tanto tempo cu e pandemia di coronavirus a paralisa tur cos. Ta contento di start cu hopi animo y positivismo. Ta gradici tur mayor, famia y amigonan cu a bin apoya nan karateka. Un palabra di danki ta bay pa tur boluntario, pa Comite Olimpico Aruba, Aruba Sport Unie, Stichting Sportsubsidie Aruba, Fundacion Lotto pa Deporte y tur otro persona cu di un forma of otro ta sostene karate di Aruba y specialmente Aruba Karate Bond. Pabien na tur participante di Aruba Summer Karate Championship 2021 y keda pendiente pa e siguiente try-outs cu pronto lo wordo anuncia.