ORANJESTAD – E caso penal cu Ministerio Publico a cuminsa contra e tres sospechosonan di asesinato di Lisander Leonardo Ignacio, lo tuma lugar na November 2021.
Aruba Native por a compronde cu recien Wuill Vrolijk, Joshua Wouters y Yael Frans a presenta dilanti Hues y a keda dicidi cu na November 2021 tratamento di e caso penal contra nan lo tuma lugar.
Via video conference, Vrolijk, Wouters y Frans a presenta dilanti Hues. Nan tabata den KIA mientras cu den sala di Corte, Hues, Fiscal y e abogadonan tabata presente.
E acusacion cu Fiscal a presenta contra Vrolijk, Wouters y Frans ta cu riba 15 di Januari 2021, intencionalmente cu cara tapa y na un manera calmo, nan a tira e difunto Lisander Leonardo Ignacio. Ta asina cu e victima tabata sinta den un auto den cura di e cas y e tres sospechosonan a yega cu caranan tapa y los tres tiro riba dje. Dos tiro a alcanza e victima den cabez, cu consecuencia cu el a fayece. Tambe Fiscal ta acusa e trio aki di posecion di arma di candela.
Ta asina cu e caso a bin dilanti pro forma, caminda Hues no ta trata e caso sino ta fiha un fecha pa e tratamento. A keda dicidi cu dia 5 November 2021 lo tuma henter dia pa tratamento di e lamentable caso aki.