Louisville, Kentucky:
Diabierna ultimo polis di Louisville, Kentucky a duna prensa, e imagennan di bodycamnan di polis pa publicacion. E imagennan cu a wordo duna liber pa publicacion, ta imagennan cu a wordo capta na momento cu polis a detene un homber cu mey ora prome a secuestra un mucha muhe di 6 aña.
E incidente aki a tuma lugar diabierna dia 2 di juli, na Louisville, Kentucky. E criatura tabata hungando pa fo, na momento cu chauffeur di un Dogde Challenger cora a para, e chauffeur a baha, a ranca e mucha hink’e den e auto y a sigui core bay. Testigonan cu a mira locual a caba di sosode, mesora a core yama polis y a duna polis tur detayes di e auto y e chauffeur.
E informacion cu e testigonan a duna polis, a pone cu polis mesora a cuminsa cu un buskeda pa e auto aki, hopi liher nan a logra trace e auto.
Riba e grabacion di e bodycam, por a mira con un agente policial a logra detene e sospechoso. Door di actuacion efectivo y liher di polis, den mey ora nan a logra libera e criatura.
E sospechoso ta un homber di 40 aña, despues di su detencion e la declara cu e tabata kier a core bay bek, na momento cu e la realisa cu locual e la haci ta fout. E homber a keda deteni y e por spera un castigo di prison basta largo di entre 10 pa 20 aña.