ORANJESTAD – Awe mainta via video conference Hues a dicta sentencia den e caso penal cu Ministerio Publico a cuminsa contra e hombernan A.C.R., G.V.D.S., V.V.L. y W.Q.A. Tur ta wordo acusa di importacion di cocaina ariba e anochi di 22 pa 23 November 2020. E cargamento di cocaina lo mester a yega cu boto na Arashi y despues hiba na e cas di cunucu na Curimiauw. Hues a castiga e grupo aki menos di loke Fiscal a exigi.
Tres siman pasa tratamento di e caso a tuma lugar caminda Fiscal a bisa Hues cu e sospechosonan kier laga pasa cu nan no sa nada di droga y cu pa casualidad nan tabata eynan. A.C.R. ta responsabel pa e cantidad di marihuana cu a hay’e cun’e y G.D.S tambe. A haya mas cu 5 kilo di cocaina na e cas. Ta hopi straño cu ningun hende sa di e droga aki. Polis a scucha combersacionnan cu a mustra cu droga yega na beach. A mira auto di A.C.R. na e beach y despues a bay na e cas di cunucu na Curimiauw. Haya cu loke e grupo ta declara no ta cuadra nada cu loke Polis a observa. No kere loke A.C.R. awor ta bin declara den Corte. Su siguiente dia ora Polis a bay investiga na e cas, a haya e droga. Haya cu e grupo tabata sa di e droga. V.V.L. hasta a core bay cu e tas cu droga. A haya 3 kilo den e tas. Ta mucho casualidad cu esnan cu a scucha den e tap tabata na e cas. Haya nan culpable di importacion di 5 kilo di cocaina. Haya cu ta henter un organizacion a tuma lugar. Fiscal a exigi 3 aña di prison pa A.C.R., V.V.L. y W.Q.A. y 3 aña y 6 luna pa G.D.S. kende anterior a wordo condena pa droga.
Hues a bisa cu e acusacion contra A.C.R., V.V.L., W.Q.A. y G.D.S. ta cu nan a importa cocaina riba e anochi di 22 pa 23 di November 2020. Tambe ta acusa G.D.S. di posecion di 400 gram di marihuana.
Hues a bisa cu a base di scucha yamadanan di cellular, Polis tabata vigila e movecion di e grupo aki. A persigui un auto, maneha pa A.C.R. cu un aparato special. Asina a haya sa cu e droga a yega na Arashi y despues bay na e cas di cunucu di G.D.S. Su siguiente dia a haci un investigacion na e cas caminda a haya 3 kilo di cocaina y a haya A.C.R., V.V.L. y W.Q.A. Ta asina cu A.C.R. a core bay y a tira un tas den un vijver. Den e tas a haya 2 kilo di cocaina.
Hues a bisa cu A.C.R., W.Q.A. y V.V.J. a importa cocaina e anochi ey. Pa cu e castigo, Hues a mustra cu importacion ta duna Aruba un mal nomber y ta fomenta criminalidad. El a condena A.C.R., W.Q.A. y V.V.J. na 2 aña y 6 luna di prison.
Pa loke ta G.D.S., Hues a bisa cu G.D.S. a desmenti di tabata envolvi cu cocaina. El a admiti di tabatin e 400 gram di marihuana. Na opinion di Hues, e solo hecho cu a haya droga den G.D.S. su cas, no ta suficiente pa bisa cu G.D.S. sa di e lote di cocaina. Ta un muher tabata sa di e droga aki y a papia cu A.C.R. Hues a declara G.D.S. liber di a importa cocaina. Hues ta haya G.D.S. culpable di e 400 gram di marihuana y a conden’e na 12 luna di prison.