Stichting Monumentenfonds Aruba ta obtene prestamo for di NRF den cuadro di e Covid Crisis.

Nationaal Restauratiefonds (NRF) a pone un total di 70 miyon euro disponibel pa Monumentonan y organisacionnan di monumentonan den reino cu ta habri pa publico pero cu debi na e situacion cu e Crisis di Covid a trece cune, a perde parti di nan entrada.

Stichting Monumentenfonds Aruba (SMFA) ta un fundacion cu no ta ricibi subsidio y ta depende di e entrada di nan huurdonan. Debi na e crisis cu e pandemia a trece cune, algun di nos huurdonan no a haya entrada pa cual no por a cumpli cu nan huur. SMFA teniendo cuenta cu esaki a baha e pago mensual di algun di  edificionan cu no tabata genera entrada. Esaki a afecta e fundacion tambe pa cual motibo Stichting Monumentenfonds Aruba a haci un peticion na e posibilidad aki cu NRF ta brinda mirando e situacion cu e fundacion a enfrenta e ultimo lunanan.

Na principio e prestamo no tabata destina pa e islanan den reino pero a base di peticion di SMFA, NRF toch a dicidi di pone 750 mil euro disponibel pa e organisacionan na e islanan di Caribe Hulandes.

Na fin di juni SMFA a ricibi e bon noticia cu a aproba e peticion.
Ta trata di un prestamo pa un periodo di diescinco aña na un interes di 1 % y lo mester cuminsa paga esaki dentro di tres aña bek.  E suma ta varia segun cada organisacion.

Pa locual ta trata Stichting Monumentenfonds Aruba nos ta hopi agradecido na e cooperacion cu semper nos ta ricibi for di NRF y tambe e posibilidadnan cu e fondo aki di Hulanda a crea pa organisacionnan den Reino por supera e situacion dificil cu e Pandemia a trece cune.
Danki na e aporte aki nos por sigui garantisa e preservacion di nos monumentonan pa futuro generacionnan.