Home Local Rotary Club Aruba ta introduci “Rotary Container Sales”

Rotary Club Aruba ta introduci “Rotary Container Sales”

SHARE

Diadomingo 11 di juli 2021 Rotary Club Aruba lo presenta “Rotary Container Sales” na nos comunidad di Aruba. E idea aki a nace como cu Rotary Club Aruba tin 2 aña sigui cu no ta organisa e popular Fiesta Rotaria. E pandemia covid-19 a introduci diferente rekesitonan y medidanan riba nos comunidad cu a haci Fiesta Rotaria den su formato di custumber imposibel.

Sinembargo Rotary Club Aruba no a para keto y asina a keda colecta diferente containers cu diferente articulonan di cas, mata, paña y mucho mas. Rotary Club Aruba tin un alredor di 18 container yena cu diferente articulonan y ta cla pa ofrece esakinan na nos comunidad. Esaki ta e concepto tras di e proyecto “Rotary Container Sales”. Ariba 4 diadomingo den luna di juli y augustus di 9’or di mainta te cu 3’or di atardi por pasa na Club Kibrahacha 60+ na Piedra Plat y cumpra diferente articulonan na un prijs atractivo. 

E prome diadomingo lo tuma luga dia 11 di juli na Club Kibrahacha 60+ unda lo bay bende meubels y articulonan pa cas. Lo bende articulonan manera cama, cashi, lesenaar y mucho mas.

Pa evita aglomeracion Rotary Club Aruba a introduci un sistema di “drive through” na e Rotary Container Sales. E sistema aki ta insera cu lo traha cu “time slots”.  Cada “time slots” di 30 minuut lo tin 10 cupo disponibel pa duna espacio pa subi e sitio y escohe articulonan cu lo kier cumpra y despues ta sigui e turno di e siguiente 10 reservacion. 

Registracion ta bay solamente via nos Facebook page di Fiesta Rotaria by Rotary Club Aruba. Ariba e pagina social aki bo lo mira un buton cu ta bisa “book now”. Click esaki y kies e diadomingonan y oraio cu abo ta desea di bin. Despues lo haya un confirmacion di e cita. Si tin cualkier pregunta por haci esaki tambe via nos pagina di Facebook cu lo yuda bo cu bo pregunta. 

E prome Rotary Container Sales lo tuma luga dia 11 fo juli 9am -3 pm na Club  Kibrahacha 60+ na Piedra Plat. Sigui pa diadomingo 18 y 25 di juli y 1 di augustus. E invitacion ta keda extende na henter comunidad di Aruba pa bin Rotary Container Sales. Pa bo haya bo oportunidad pa cumpra articulonan di bon calidad na un bon prijs. Y na mesum momento contribui na nos comunidad. 

 

Rotary Club Aruba kier a extende un palabara di gradicimento na tur nos sponsornan y colaboradornan cu sin nan sosten y nan confiansa den Rotary Club Aruba e evento aki no lo ta posibel. Masha danki