ORANJESTAD – Awe mainta Corte di Husticia a trata e caso penal cu Ministerio Publico a cuminsa contra un mucha di 16 aña. Ta trata aki di un lamentable caso caminda e mucha E. a hinca su welo, difunto Alex Tromp di 77 aña mata.
Aruba Native por a compronde cu apesar cu Corte a prohibi prensa pa cubri e caso, a logra haya informacion.
E lamentable caso aki a sosode dia 6 Januari 2021 na Madiki, caminda e mucha E. (16) a hinca su welo, difunto Alex Tromp (77) diferente biaha cu un cuchiu, cu consecuencia cu Alex Tromp a fayece.
Fiscal ta haya E. culpable y mirando su edad, a aplica e ley hubenil. Fiscal a exigi castigo hubenil di 4 aña di prison pa E., di cual 1 aña ta condicional cu un tempo di prueba di 2 aña y bou guia di Reclasering. Hues, despues di a scucha defensa di abogado, a bisa cu e ta bay studia e caso y dia 20 di Juli 2021 lo tin sentencia.