Tanki Leendert: Diabierna den oranan di mainta presencia di polis a wordo pidi pa un accidente riba un caminda di santo na Tanki Leendert.
Na yegada polis a bin topa cu un boksmento, entre un Toyota Rush y un boxminivan. Na e sitio nan a bin compronde cu e chauffeur di e Minivan lo a tuma un bocht hopi grandi na su man robes, net na momento e Toyota Rush tabata biniendo.
E chauffeur di e Rush a trata na evita un impacto, pero lastimamente no a logra. E boxminivan a pasa dal e auto na e banda di chauffeur, parti patras, kibrando un luz di auto. E Toyota Rush den e impacto a bay dal contra un mata di kwihi. E Rush a haya basta daño material na e parti di dilanti tambe.
Aparentemente e boxminivan lo ta pertenece na un compania, e chauffeur no tabata tin rijbewijs y na momento cu polis a pidi’e pa un documento valido of su permiso, e no por a mustra polis niun di esaki.
No a keda polis nada otro cu detene e chauffeur, transport’e pa warda di polis y despues entreg’e na Guarda Nos Costa pa asina prepara e tramitenan pa e por wordo expulsa for di Aruba.
