Dia 25 di juni 2021 pueblo a haci uso di su deber civico pa escohe un parlamento nobo. Apesar di tantisimo evidencia di mal gobernacion y corupcion, un bes mas e pueblo a escohe pa kere den promesanan y palabranan bunita enbes di exigi introducion inmediato di reglanan estricto di Bon Gobernacion via un “CRISIS-KABINET”.
Tur e añanan anterior despues di eleccion Gobernador a invita TUR partido cu a participa na e respectivo eleccionnan di 2013 y 2017, sin mira ken a haya representacion den Parlamento. Lamentabelmente e biaha aki, Gobernador a scohe pa NO hasi esaki.
Sinembargo como e “watchdog” pafo di Parlamento, UPP a manda un carta hunto cu un addendum pa sr. Gobernador na unda nos a duna nos ideanan pa un gobernacion realmente drechi y no un biaha mas un gobierno yená cu promesanan y palabracionnan cu e pueblo conoce caba.
Nos por a ripara den e ultimo dianan aki, despues di eleccion, movecionnan straño y desaroyonan interno den seno di incluso partidonan chikito, cu ta duna muestra no di un aire nobo, sino e mesun aire trandicional den politica aki na Aruba. UPP di un banda ta mira cu pueblo a rechasa gobernacion totalitario y a duna un oportunidad na partidonan cu no tin representacion ainda den Parlamento e beneficio di duda. UPP su punto di bista desde hopi tempo ta cla.
UPP ta kere cu e direccion cu nos gobernacion a wordo hiba, no ta keda espacio pa nada otro pa den union nacional nos atende cu nos problemanan, y asina tambe enfrenta Hulanda na su debido tempo. Esaki por, solamente por medio di un gabinete a-politico, cu nos a yama Gabinete di Crisis, mirando e tantisimo crisisnan cu Aruba ta enfrenta. Pa un periodo di 1 pa 2 aña nos ta kere cu lo ta na su lugar, manera Gobernador a duna den su tarea na e informadornan, pa bin cu un gabinete cu ta conta cu e sosten mas amplio posibel. Y pa nos di UPP nos ta wak esaki den un gabinete cu ta wordo sosteni pa nos Parlamento completo, cu esnan cu mas voto a haya den e ultimo eleccion den Parlamento, cu na su turno ta carga e gran mayoria di nos electorado.
Apesar cu e indicacion ta grandi cu formacion di gobierno riba un base hopi smal ta cla caba, UPP ta kere cu sano huicio mester prevalece y no mira partido awor aki, sino Aruba. Particularmente si nos wak e idioma cu Secretario di Estado Sr. Knops a papia ayera na ocasion di su bishita na Aruba y sin lubida e presidente di CAFT esta sr. Gradus.
Adhunto UPP lo publica e carta y addendum pa asina ey na un manera transparente pueblo mes por husga pa su mes. Na final palabranan di exito na e Parlamento cu lo wordo instala awe. Ban spera cu e Parlamento aki si bay hasi nan trabow como controlador y no bira un biaha mas un “verlengstuk” di gobierno.
8 di juli 2021
Presidente di UPP
Booshi Wever
Brazil 163