Oranjestad, –Aruba Bank a host un serie di sesionnan educativo conhuntamente cu e grupo di e programa ‘Subi Jet Pa Bo Get’, diseña pa studiantenan cu ta bai cuminsa cu nan estudio na Hogeschool Rotterdam na september 2021.
‘Subi Jet Pa Bo Get’ ta un programa cu ta wordo dirigi y ofreci pa Hogeschool Rotterdam pa guia studiantenan. E programa ta diseña na un forma practico, cu ta yuda e hoben prepara ariba tereno di entre otro finansa, cultura, heimwee, huisvesting, seguro, soft skills y por ultimo e estudio mes. E programa ta yuda forma un base solido den nan preparacion pa emigra como studiante na Hulanda.
“Subi Jet Pa Bo Get” ta consisti di un total di diez (10) sesion. Di cual seis (6) sesion na Aruba y cuater (4) na Hulanda. Door di completa e programa, e studiante ta cualifa pa su prome dos (2) studiepunten di e prome aña escolar na e instituto Hogeschool Rotterdam.
Representante di Aruba Bank, Sra Suzette Bareño – Human Resources Senior Advisor, conhuntamente cu Sra Lisanne Gomez – Docente di Economia na EPI, a facilita e workshopnan aki conhuntamente cu Ghislain Thode – Educador Freelance kende ta encarga cu prepara studiantenan pa e 21+ Toets. E representantenan di Aruba Bank y di EPI a comparti nan experiencia di nan estudio y nan tempo como studiante, como cu nan tambe a sigui nan estudio na Hogeschool Rotterdam.
E programa aki ta percura pa studiantenan sera amistad y pa duna sosten na otro. Mayornan tambe tabata invita pa forma parti di e programa na unda nan duda, miedo y preocupacionnan ta wordo comparti.
E aña aki a tene un les adicional di cushinamento bou di encargo di Sr Willem Seferina – Empresario, kende a duna e studiantenan e base solido pa traha sopi y un bon stoba.
Aruba Bank ta felicita e studiantenan cu a completa e programa di ‘Subi Jet Pa Bo Get’, y alabes ta desea tur studiante hopi exito den nan preparacionnan pa sigui cu nan estudio den exterior.
