Home Local N.V. ELMAR ta relata riba e black-out di diasabra y storing di...

N.V. ELMAR ta relata riba e black-out di diasabra y storing di diadomingo

SHARE

(Oranjestad) – Na prome lugar ELMAR ta pidi un disculpa na su clientenan pa cu e fayo den distribucion di coriente cu a tuma lugar pa cu e black-out di diasabra y storing di diadomingo. For di oranan di atardi ELMAR a wordo notifica door di WEB cu nan lo tin problema serio den nan planta cu lo por ocasiona cu basta area di Aruba lo por keda sin suministro di coriente. Bao di guia di Director di ELMAR Sr. Anthony Irausquin y Asset Manager Sr. Albertico Koolman, mes ora a mobilisa su tecniconan pa presenta na tur station pa asina ta prepara pa cualkier fayo cu lo por a presenta. Tawata casi 4’or di atardi ora cu ELMAR a wordo notifica cu WEB a kita suminstro di coriente di “ELMAR 2” cu ta suminstra area di Sta Cruz y vecindario. Un paar di minuut despues WEB ta kita sumistro di “ELMAR 5 y 6” (area di Tanki Leendert/Pos Abao y Sabana Blanco). WEB a avisa cu e chens lo ta grandi cu e lo interumpi suminstro di mas feeder. Un rato despues tawatin un black-out total.
For di e momento aki tur nos tecniconan tawata den comunicacion constante cu WEB pa asina haya e señal pa cuminsa suminstra coriente bek na nos clientenan.
Segun WEB por a tuma load, ELMAR poco-poco, riba peticion di WEB mes, tawata suministra coriente. Tawatin ocasion cu mester a kita bek suministro di coriente ariba peticion di WEB mes pa asina preveni pa WEB hay’e den situacion serio atrobe.
Pa 8.20 a haya prome señal for di WEB pa cuminsa suminstra coriente via OS Balashi (Dieselstraat/Santa Cruz y vecindario). Tecniconan di ELMAR a keda pendiente y suministrando coriente te cu 5.15am (diadomingo mainta).

Diadomingo, 11am, e prome problema cu a presenta tawata den area di Brazil, ocasiona pa un mata cu a causa corto circuito door di biente fuerte, den waya di coriente cu a kima un transformator. ELMAR mesora a atende cu e fayo aki y pa 1.20pm tur cliente tawatin coriente.

Na Cumana tawatin 2 kabelstoring pa 5.15pm. Esaki tawata ocasiona door cu a pone extra load riba e kabelnan durante di e black-out. ELMAR ta investigando e causa exacto di esaki.
Consequentemente a surgi otro kabelstoring na SS Piedra Plat cu probablemente lo a wordo ocasiona pa mesun motibo extra load. Pa 5.35pm tur cliente tawatin coriente bek.

ELMAR no tawata presente diadomingo na e rueda di prensa yama pa WEB, como cu ELMAR ta di opinion cu esaki tawata na WEB splica e suceso di black-out di diasabra.

ELMAR kier gradici tur su tecniconan cu a traha incansablemente pa suministra coriente bek na pueblo di Aruba.