Oranjestad – Turismo di Aruba ta lantando cabes fuertemente y economia ta recuperando miho cu a spera. Pa un gobierno nobo reduccion gradual di e debe publico lo mester para central. Pa logra esey e presupuesto di 2022 mester ta un presupuesto balansa y esun di 2023 mester presenta un surplus di 1% di e PIB. Pa awor ta un hecho cu na mita di aña ainda no a aproba e presupuesto di 2021. Colegio di supervision financiero di Aruba (CAft) ta pidi Aruba pa ainda haci esey mas pronto posibel y considera den tal caso si por reduci gasto.
E crisis di pandemia a dal Aruba duro. E aña aki Hulanda a duna te cu e di tres kwartaal AWG 489 miyon na sosten di likides, como complemento di e AWG 414 miyon cu a pone disponibel pa Aruba aña pasa caba. Cu e placa ey a financia, entre otro, medida di sosten, door di cualnan por a preveni bancarota y a salba empleo. Awor economia ta recuperando rapidamente, di acuerdo cu e ultimo pronosticonan di Aruba Tourism Authority (ATA). Si e tendencia aki continua, e expectativa ta cu den e prome kwartaal di 2022 turismo lo ta atrobe na e nivel di prome cu e crisis di pandemia.
Aprobacion di presupuesto di 2021
E proyecto di presupuesto di 2021, tocante cual CAft a duna conseho na januari, a conoce den e sector colectivo un deficit di casi 24% di e Producto Interno Bruto (PIB). CAft a haci diferente recomendacion pa reduci e deficit ey. CAft ta lamenta cu ainda Parlamento no a trata e proyecto di presupuesto y ta enfatisa importancia di un proceso presupuestario ordena. Ahustacion di e proyecto di presupuesto ta necesario aworaki, pa motibo di e efectonan positivo di un recuperacion di turismo mas rapido cu loke a premira. Tambe a pidi Aruba pa bolbe revisa e gastonan den presupuesto na un manera critico. Cu miras riba e retraso di e cuenta anual di 2019 y e repercusion di esey den e cuenta anual di 2020, CAft ta enfatisa un biaha mas importancia di completa e ciclo presupuestario y di hustificacion na tempo tambe.
Traha pa logra un surplus presupuestario mas lihe posibel
Aruba tin un debe nacional den fuerte aumento. Pa fin di e aña aki e debe lo monta na aproximadamente 130% di e PIB. E gastonan di interes ta suma entretanto mas di 5% di e PIB. Un surplus den e presupuesto ta e unico manera pa reduci e debe nominal di Aruba. Kiermen, ta di gran importancia pa Aruba elimina e deficitnan y elabora un presupuesto cu un surplus mas pronto posibel. P’esey, ta haci e recomendacion pa na 2022 yega por lo menos na un presupuesto balansa y for di 2023, manera a acorda den e protocol cu Hulanda, na un surplus di 1% di e PIB den e presupuesto. Esaki lo por ta tambe un señal importante pa e mercadonan (internacional), tambe pasobra pa e momentonan ey e acuerdonan di refinanciacion cu Hulanda ta termina.
Reforma fiscal
Na 2019 Aruba a cuminsa cu e reforma fiscal, den cual ta modifica y simplifica e sistema di imposicion y impuesto. Te aworaki a implementa solamente un parti di e reformanan planea, door di cual ta existi e riesgo cu segun saldo por papia solamente di aumento di carga. Ta di gran importancia pa implementa e reforma fiscal den su totalidad y a corto plaso. Den tal caso ta deseabel pa introduci pa impuesto indirecto un Impuesto riba Balor Agrega (IBA/BTW).
Ayera y awe CAft a haci un bishita na Aruba. A hiba combersacion cu, entre otro, Gobernador, Ministro di Finansa, Asunto Economico y Cultura, Conseho di Ministro y e Comision Parlamentario di Finansa, Asunto Economico y Organisacion Gubernamental. Banda di esey CAft a haci bishita na Autoridad di Turismo di Aruba (ATA), Organo Ehecutivo di Seguro Medico General (UOAZV) y Hospital Dr. Horacio E. Oduber (HOH).