Censo no a pone mi fam riba e stembiljet conforme cu e Kiesverordening pero si a sigui tur entrevistanan y video cu e fam cu mi a usa pa campaña por wak cu como candidato politico mi persona a papia di maneho so y no di Dios.
Pero e gobierno ultimo si a pega estado y iglesia na otro door di laga pastoor bautiza kokolishi na 2017. Y 95% di tur hende y politico na Aruba si ta menciona Dios henter ora. Es mas si nos por a haña Afl. 1 florin pa cada mencion por a paga e debe por completo te resta. Asina ta: permitimi àmi tambe pa papia 1 biaha di Dios y su norma y balornan. Ban laga e grito y deseo di separacion di estado y iglesia un banda. Pasobra pa cuminsa separacion di estado y iglesia no tin ningun base legal mientras cu e derecho pa eherce religion si ta ancra den ley (art. I.15 di SVA). Y pa di dos pa hende tumabo na serio bo mester ta consistente den bida. Sea bo ta separe por completo y henter ora manera e atheistanan ta haci of no como creyente. No por considera e estado y iglesia manera un macho y embra cu bo ta kita y pone bek ora ta cumini bo.
E issue no ta si e candidatonan politico ta christianan of no. Paso ta Dios só sa esey. Ni ken ta haci pica of no, paso nos tur ta pecador. No. Un creyente cu ta stima Dios lo kier obedece Su Leynan (Huan 14:21) y ta vota pa e partido cu ta para pa e leynan di Dios y ta subi ariba e lista di e partido ey. Y mas aun ora bo sa cu tin (un) partido(-nan) cu kier introduci leynan cu ta bay contra di leynan di Dios den e siguiente gobernacion. Cu votamento tambe un ciudadano ta haci un choice, si e ta na banda di Dios Su leynan of no. Por compara votamento cu tempo di Moises, un di mi antecedentenan, ora ela a pidi e pueblo pa scoge ken ta para na banda di Dios.
Partido CURPA ta e unico partido cu posicionan fiho pa cual ta trata leynan di Dios y tur otro suheto. Pues den mi opinion personal e mayoria, incluyendo mayoria di pastoornan y nan miembronan, a papia cla y raspa pa medio di e elecion cu no tin lugar pa Dios Su Leynan den gobernacion na Aruba. Y ami ta respeta esey y ta conclui pues cu mi mision personal como candidato politico cu ta un creyente a termina conforme e principio di Mateo 10:14.
Pa subi lista di un partido na Aruba cu ta para pa e leynan di Dios bo mester ta un mártir pasobra bo lo wordu ataca mas cu qualquier criminal na Aruba. Pero mi a hacie. Y awor cu e trabou a caba mi ta contento y satisfecho di por a cumpli cu e tarea aki y pa por sigui cu e siguiente tareanan y contento paso bida cu Dios ta un aventura.
Un danki di mi curazon ta bay na tur e votadornan di partido CURPA incluyendo e pastoornan cu sí a sostene CURPA. Obediencia semper lo trece bendicionan pa bo hogar (Salmonan 1:1-4, Deutoronomio 28:1-14).
Esnan cu a recibimi of colega di partido den su cas of como entrevistador sin cobra pe tambe lo recibi un recompensa (Mateo 10:40-42).
Y por ultimo na tur e partidonan escogi: hopi exito!