Home Politics Historia por bay ripiti, na 1985, un bloke di tres partido di...

Historia por bay ripiti, na 1985, un bloke di tres partido di 6 asiento

SHARE

NO ta prome biaha pueblo ta opta pa vota pa partidonan chikito haya asiento, na 1985, pueblo a duna partidonan chikito 6 asiento y nan a forma un bloke di 6 y a join cu AVP cu 7 asiento, un base amplio di 13 asiento cu no a wanta full un periodo di gobernacion, pero cu a keda garna y na final a keda un gobierno demisionario.

Na November 1985, Aruba a bay elecion esaki tabata e aña cu e refineria L.A.G.O. a dicidi di cera su porta. E tabata un temporada hopi dificil pa e gobierno e tempo ey, e partido MEP tabata na mando. Despues di a gana na 1983 cu 13 asiento, na 1985 a topa cu un di e retonan di mas grandi di e tempo ey, cu tabata e cierre di e refineria. E lider di MEP Sr. Betico Croes dfm, despues cu no a logra haya benta e tempo ey pa e refineria, a tuma un desicion,  den tur sinceridad  Betico a pidi pueblo di Aruba pa hunto yuda nos isla supera e crisis  cu tabata azotando nos isla, despues di cierre di e refineria. Sin sa cu pueblo lo bira lomba p’e, e la opta pa introduci pa solamente un periodo cortico, un impuesto di solidaridad di 8.2%.

Aki tabata caminda cu partidonan den oposicion a cuminsa un campaña contra e impuesto aki, e conocido propaganda tabata Sr. Henny Eman para na un pomp di gasoline etc. Pueblo a bay tras di promesanan, manera nan a priminti cu asina nan drenta gobierno nan lo elimina e 8.2%. Despues di 10 aña sosteniendo MEP, pa tur su logronan grandi,  pueblo a cay den e promesanan cu nunca a keda realisa.

Na november 1985, e resultado di elecion tabata cu MEP a sali partido ganado cu 8 asiento y Betico a haya 8.879 voto, cual tabata mas o menos 20% di e votonan, Betico dfm tabata un biaha mas e votegetter.

Avp despues di mas di 13 aña den oposicion a logra haya 7 asiento.  Tres partido chikito cada un a haya dos asiento, nan a forma un bloke di 6 y hunto hopi liher a laga sa cu nan no lo  traha cu e partido mas grandi, cu ta MEP.

Asina ADN, PPA y PDA a escoge pa forma un gobierno di coalicion cu AVP.  Segun nan esaki lo tabata pa traha riba un base amplio, pero ni dos aña despues na 1987, e Gabinete Eman I, a bay pidi sosten di e partido AD86, esaki despues cu e partidonan chikito a cuminsa bandona e coalicion, e gobierno keda funciona demisionario pa un tempo y na final di 1988 mester a yama un elecion di nobo. Tambe e gobierno aki, no a cumpli cu nan promesa di elimina e 8.2%, pero a opta pa tene e medida aki pa mas tempo cu tabata e intencion anteriormente di MEP y tambe no a elimine pero a haci 4.1% a sigui rek e.

E bloke di 6 na 1985 no a funciona, y dos di e partidonan a muri, cual PDA a muri prome y despues ADN. PPA so a sobrevivi e bloke aki pero nunca mas a bira un partido grandi.

Actualmente dos di e tres partidonan chikito kier bolbe forma un bloke e biaha aki di 5 asiento. Ban wak si e lo traha.